14 protestuesit e arrestuar dalin para gjykatës, mbështetësit në protestë: Nuk jeni vetëm!

Sot para Gjykatës së Tiranës do të dalin 14 protestuesit e arrestuar dy ditë më parë. Atje do t'u komunikohen masat e sigurisë. Para ambienteve të gjykatës, një grup qytetarësh është mbledhur në mbështetje të tyre. Po brohorasin thirrje si "Lironi shqiptarët", "Nuk jeni vetëm" dhe "Çuna, goca, jemi këtu. Gjithë Shqipëria është për ju".

Protesta e tyre ishte e 94-ta në radhë para ndërtesës së Kryeministrisë. Sipas Policisë së Shtetit, situata u tensionua kur disa prej tyre nuk iu bindën urdhërave. Vazhduan me veprime aktive kundër efektivëve. Kur blutë nisën zhvendosjen e turmës për të liruar hyrjet e godinës, një pjesë e manifestuesve u ulën në asfalt duke bërë rezistencë.

Në raportin policor pretendohet se protestuesit goditën dhe shtynë efektivët gjatë ndërhyrjes. Pas përfundimit të veprimeve procedurale, u arrestuan në flagrancë 14 persona. Të njëjtat burime bëjnë me dije se tre individë të tjerë do të procedohen penalisht në gjendje të lirë. Identifikohen si M. J., 47 vjeç, A. T., 54 vjeç dhe A. G., 56 vjeç.

Emrat e 14 të arrestuarve janë: D. G., 50 vjeç; J. M., 38 vjeç; E. L., 28 vjeç; E. A., 35 vjeç; S. B., 50 vjeç; L. Gj., 47 vjeç; V. Sh., 52 vjeç; F. M., 22 vjeç; D. A., 29 vjeç; B. M., 34 vjeçe; A. Ll., 28 vjeçe; Y. B., 38 vjeç; A. K., 46 vjeç dhe A. D., 30 vjeç.