Zyrtare/ Humbja në derbi ka pasoja, Partizani largon trajnerin rumun Bratu

Zyrtare: Partizani ndan rrugët me Florin Bratun pas disfatës në derbi

Partizani ka shkarkuar Florin Bratun nga posti i trajnerit. Vendimi u zyrtarizua një ditë pas derbit të humbur 3-1 ndaj Tiranës.

Klubi i kuq njoftoi mbylljen e bashkëpunimit me teknikun rumun dhe stafin e tij. Shkak u bënë rezultatet negative në nisjen e këtij sezoni.

Sipas klubit, ecuria zhgënjyese ka cenuar rëndë objektivat sportivë të ekipit. Lajmi u konfirmua zyrtarisht gjatë ditës së sotme.

Seancën e ardhshme stërvitore do ta drejtojë Alfred Deliallisi. Ai aktualisht mban detyrën e trajnerit te Partizani B.

Në komunikatën zyrtare klubi kryeqytetas falënderoi teknikun dhe bashkëpunëtorët e tij për punën e bërë dhe u uroi suksese më tej.

“FK Partizani njofton përfundimin e bashkëpunimit me trajnerin Florin Bratu dhe pjesëtarët e stafit të tij teknik. Ky vendim vjen si pasojë e rezultateve zhgënjyese të regjistruara në këtë fillim sezoni, të cilat kanë cenuar ndjeshëm objektivat sportivë të klubit. Seanca e radhës stërvitore do të drejtohet nga Alfred Deliallisi, trajneri aktual i Partizanit B. FK Partizani i uron Florin Bratu dhe stafit te tij suksese në vazhdim të karrierës së tyre sportive”, thuhet në njoftimin e klubit.