Zjarri në Kalivaç dhe Zimaj drejt shuarjes, rreth 200 hektarë të djegura

Situata me zjarret në Kalivaç e Zimaj të Njësisë Administrative Ungrej është dukshëm më e qetë këtë mëngjes, pas ndërhyrjeve intensive. Më datë 4 shtator, forcat e zjarrfikësve, ushtria dhe shërbimet e tjera arritën të vënë nën kontroll pjesën më të madhe të flakëve.

Njëri prej vatrave kryesore aktive është shuar plotësisht. Megjithatë, ende vërehet tym në disa pika dhe digjen ndonjë vatër e vogël. Ekipet në terren vazhdojnë punën për monitorim, sepse rreziku i rindezjes mbetet. Ato po kryejnë ndërhyrje të tjera për izolimin e plotë të zonave të prekura.

Sipas vlerësimeve të para nga autoritetet, zjarri besohet se ka përfshirë një sipërfaqe prej rreth 200 hektarësh në dy fshatrat. Paralelisht, ka nisur verifikimi i dëmeve të shkaktuara nga flakët.

Operacioni i shuarjes ka angazhuar një numër të konsiderueshëm forcash. Në terren ndodhen aktualisht 2 mjete të Bashkisë Lezhë me 12 efektivë. Ministria e Mbrojtjes ka vënë në dispozicion 3 mjete dhe 21 efektivë. Gjithashtu, janë të pranishëm 90 ushtarë, 8 punonjës të shërbimit pyjor, 6 efektivë të Njësisë Administrative dhe 3 forca të tjera nga bashkia. Në këtë përpjekje janë bashkëngjitur edhe 12 vullnetarë.