Zjarr masiv në fshatin Kotë të Selenicës, flakët u afrohen banesave

Zjarr i madh përfshin Kotën e Selenicës, rrezikohen banesat

Një vatër zjarri u hap mbrëmjen e sotme në fshatin Kotë, në bashkinë e Selenicës. Flakët kanë pushtuar kodrën përreth fshatit. Aty janë përfshirë sipërfaqe të gjera me shkurre dhe ullishte.

Zjarri është përhapur shpejt. Era e fortë dhe terreni i vështirë kanë favorizuar avancimin e tij. Flakët po i afrohen zonës së banuar. Disa shtëpi ndodhen në rrezik të drejtpërdrejtë.

Terreni paraqitet kritik. Kapacitetet e Selenicës për emergjenca të tilla janë shumë të kufizuara. Bashkia ka në dispozicion vetëm një mjet zjarrfikës. Për këtë arsye autoritetet lokale kanë kërkuar ndihmë urgjente. Thirrja u është drejtuar bashkive përreth dhe Agjencisë Kombëtare të Mbrojtjes Civile.

Ndihma e parë ka ardhur nga Himara. Bashkia e Himarës ka dërguar menjëherë zjarrfikëse dhe ekipe në drejtim të Kotës. Në vendngjarje janë angazhuar edhe banorët. Ata po ndërhyjnë me mjete rrethanore. Qëllimi është hapja e pritave mbrojtëse rreth banesave më të rrezikuara nga zjarri dhe tymi.