Zjarr i madh edhe në Mat, terreni i vështirë pengon ndërhyrjen nga terreni, dyshohet se është i qëllimshëm!

Në mbrëmjen e 28 gushtit, flakët e mëdha kapën Njësinë Administrative Komsi të Bashkisë Mat. Zjarri u përhap me shpejtësi të madhe në pyll, duke shkaktuar panik.

Në vendngjarje mbërritën menjëherë forcat zjarrfikëse, stafi i shërbimit pyjor dhe përfaqësues të Bashkisë Mat. Të gjithë po përpiqen me forcë ta venë nën kontroll situatën.

Megjithatë, terreni malor dhe i vështirë bllokoi kalimin e mjeteve të shërbimit drejt vatrave aktive të zjarrit. Ndërhyrja nga toka u bë e pamundur për shkak të terrenit.

Autoritetet dyshojnë se zjarri është i qëllimshëm. Policia ka nisur hetimet për identifikimin e autorit apo autorëve të mundshëm të zjarrëvënies.