Zhegrova një hap nga largimi, stërvitet i ndarë nga skuadra e Juventusit!

Largimi i Edon Zhegrovës nga skuadra e Juventusit tashmë konsiderohet i sigurt. Gjendja e tij është vërtetuar nga fakti se klubi nuk e ka përfshirë lojtarin në listën e të regjistruarve për kompeticionet e UEFA-s. Ky veprim shërben si konfirmim publik i ndarjes mes palëve.

Sulmuesi kosovar tashmë stërvitet i veçuar nga grupi i parë i bardhezinjve. Për të nuk ka më hapësirë në skemën e trajnerit. Pas shfaqjes së mirë të Kenan Yildizit dhe ardhjeve të Xhezemit Boga, Niko Gonzales, Francisko Conceiçao e Vendon Mekeni, dhe aktivizimit të Alen Alajbegoviçit, rruga e tij tek Juventusi është mbyllur plotësisht.

Për Zhegrovën, tashmë mbetet të gjejë një destinacion të ri. Pas dështimit të mundësive për transferim në kampionatet kryesore evropiane gjatë javëve të fundit, vëmendja është përqendruar tek Liga profesioniste saudite. Konkretisht, pista më e fortë çon drejt klubit të Al Ittihadit.

Sipas informacioneve të publikuara nga gazeta “Tuttosport”, klubi i ri arab ka shprehur interesin më të fortë dhe është gati të paraqesë një ofertë zyrtare. Bëhet fjalë për një marrëveshje huazimi me detyrim blerjeje në fund të sezonit, formulë që do të kënaqte të gjitha palët.