“Zhegrova është fenomen”, ish-lojtari i Juventusit i thur elozhe Edonit: Mund të bëhet më i miri i bardhezinjve

Fabricio Ravanelli ka folur sërish me fjalë të mëdha për Edon Zhegrovën.

Ish-sulmuesi i Juventusit e ka cilësuar yllin shqiptar si një fenomen. Këtë vlerësim e ka dhënë në një intervistë për të përditshmen italiane "Tuttosport".

Sipas tij, sulmuesi anësor ka gjithçka për t'u bërë pika më e fortë e bardhezinjve. Vlerësimi ishte i drejtpërdrejtë.

Ravanelli theksoi se vazhdimësia do të jetë çelësi për të. Ai beson se Zhegrova është lojtari që mund të bëjë diferencën dhe të gjejë rrugën e rrjetës me rregullsi.

"I thashë se është një fenomen dhe se atë që bën për kombëtaren duhet ta bëjë edhe në stërvitje e me Juven, sepse është një fenomen. Nëse gjen vazhdimësi, mund të bëhet lojtari më i fortë i Juventusit, sepse është lojtar që bën diferencën. Ai di të shënojë. Sipas meje, ka potencialin për të shënuar 10 gola", ka thënë Fabricio Ravanelli.