Zgjedhja e 3 anëtarëve të rinj të KLP, kryeprokurori Çela kërkon zgjidhje edhe për pagat e magjistratëve: Po kalojmë periudhë të vështirë prej disa vitesh

Prokurorët votuan këtë të premte për tre anëtarët e rinj të KLP-së.

Me 165 vota, Antoneta Sevdari rikthehet në Këshill si përfaqësuese e Prokurorisë së Përgjithshme. Afërdita Ndoi fitoi garën për nivelin e apelit me 160 vota. Në shkallën e parë fituese doli Eloida Goxhi me 148 vota.

Votimi u zhvillua të premten. Në takim mori fjalën edhe kreu i akuzës.

Prokurori i Përgjithshëm, Olsian Çela, foli për boshllëqet në staf dhe ngarkesën e madhe të dosjeve. “Prokuroria po kalon një periudhë tepër të vështirë prej disa vitesh, për shkak të vakancave në organikë dhe mbingarkesës në punë”, tha ai.

Kryeprokurori u ndal edhe te trajtimi financiar i magjistratëve. Ai kërkoi bashkëpunim të sinqertë mes institucioneve për ta zgjidhur çështjen. “Për këtë nevojitet një dialog real dhe konstruktiv mes të gjitha palëve, që synon zgjidhjen e problemit dhe jo shtyrjen e tij përmes vendimmarrjeve që nuk respektojnë standardet e vendosura nga Gjykata Kushtetuese.”

Me tre emrat e rinj në përbërje, Këshilli i Lartë i Prokurorisë vijon përmbushjen e funksioneve të tij në sistemin e prokurorisë.