Zbardhet Akti Normativ për tubimet, ja rregullat e reja për protestat, gjobat nga 10-500 mijë lekë dhe…

Akti normativ për tubimet: rregulla të reja për protestat dhe gjoba deri në 500 mijë lekë

Qeveria miratoi sot aktin normativ që ndryshon ligjin për tubimet, një nismë e paralajmëruar disa ditë më parë nga kryeministri Edi Rama.

Sipas aktit, Policia e Shtetit mund të vendosë kufizime të përkohshme të tubimeve deri në 72 orë, me miratimin e prefektit, pranë institucioneve arsimore, shëndetësore dhe shtetërore. Ky hap lejohet vetëm kur ka rrezik për dhunë ose dëmtime të rënda të pronës. Në zonat e mbrojtura, kufizimi mund të shkojë deri në 48 orë.

Policia mund të urdhërojë largimin e personave që ushtrojnë dhunë, kërcënojnë ose dëmtojnë pronën në zona të mbrojtura. Këto zona përfshijnë transportin publik, aeroportet, institucionet arsimore dhe shëndetësore, si dhe objektet e trashëgimisë kulturore.

Kur në kuadër të tubimeve dallohen mesazhe që nxisin dhunë, Policia njofton personin përgjegjës. Ajo kërkon fshirjen e përmbajtjes dhe ndalimin e përsëritjes së veprimit.

Akti parashikon edhe gjoba. Pjesëmarrja në tubime të ndaluara dhe fshehja e paligjshme e identitetit ndëshkohet me 10 000 deri në 100 000 lekë. Mosbindja ndaj urdhrit për shpërndarje kushton nga 20 000 deri në 200 000 lekë. Për personat me maska, mosbindja ndaj urdhrit për shpërndarje gjobitet nga 50 000 deri në 500 000 lekë. Kësh bllokon rrugët dhe pengon qarkullimin gjatë tubimeve paguan 5 000 lekë.

Këto masa zbatohen vetëm për tubimet e dhunshme, jo për ato paqësore. Ato mund të ankimohen. Përjashtime për mbulimin e fytyrës parashihen për arsye fetare, shëndetësore ose profesionale.