Vrasja e shqiptarit në Torino, arrestohen gruaja e viktimës dhe partneri i saj i ri

Hetimet për vrasjen e 55-vjeçarit shqiptar Mikel Rroku kanë çuar në arrestimin e dy personave në Itali. Viktima u gjet e pajetë dhe me dëmtime të rënda në kokë brenda banesës së tij në Torino, më 6 korrik të këtij viti.

Në pranga kanë përfunduar bashkëshortja e 55-vjeçarit, 45 vjeçe, dhe partneri i ri i saj, 52 vjeç. Të dy janë shtetas italianë. Ata dyshohen si autorë të vdekjes së Rrokut.

Urdhrat e arrestit u ekzekutuan nga karabinierët e Komandës Provinciale të Torinos. Operacioni u zhvillua në orët e para të mëngjesit të së martës.

Trupi i shqiptarit u zbulua më 6 korrik në apartamentin e tij në rrugën Verolegno, në lagjen Lucento. Ai ishte në dekompozim të avancuar. Fqinjët kishin lajmëruar autoritetet pasi një erë e rëndë vinte nga banesa.

Pas disa muajsh hetime, autoritetet italiane i kanë identifikuar dy të arrestuarit si autorë të dyshuar të krimit. Për ta është kërkuar masa e arrestit në burg. Ndërkohë hetimet vijojnë për të zbardhur plotësisht rrethanat dhe motivin.