Vllaznia nuk humbet kohë dhe zyrtarizon trajnerin e ri, ja kush ulet në pankinën shkodrane

Vllaznia ka emëruar pa humbur kohë pasuesin e Edi Martinit në pankinë.

Kuqeblutë kanë zyrtarizuar Csaba Lazlon si trajnerin e ri të ekipit të parë. Hungarezi pritet të marrë në dorë drejtimin e shkodranëve dhe të nxjerrë skuadrën nga situata e vështirë e këtij fillimi sezoni.

Konfirmimi erdhi nga vetë klubi. Njoftimi u publikua në rrjetet sociale vetëm pak orë pas shkarkimit të Martinit.

Në komunikimin zyrtar, Vllaznia i uron mirëseardhjen teknikut të ri me një postim të veçantë. "Mirësevjen te Vllaznia, Csaba Lazlo. Eksperiencë ndërkombëtare nga Bundesliga, Skocia, Belgjika, Hungaria dhe drejtimi i dy Kombëtareve. Trajneri i Vitit në Skoci. Trajneri i Vitit në Hungari. Eksperiencë. Personalitet. Ambicie. Një kapitull i ri fillon në Shkodër. Mirë se erdhe, Mister!", thuhet në njoftim.

Gjatë karrierës së tij, Lazlo ka drejtuar emra të njohur. Në CV-në e tij figurojnë klube si Borussia Moenchengladbach, Ferencvaros, Dundee dhe Charleroi.

Në vitin 2004 ai ishte pjesë e stafit teknik të Hungarisë, në rolin e zëvendëstrajnerit. Skuadra e fundit që ka drejtuar është Sepski në vitin 2025. Tani në rrugëtimin e tij shtohet edhe aventura në Abissnet Superiore me Vllazninë.