Vjeshta shuan flakët! “Mbrojtja”: Asnjë vatër aktive. U fikën zjarre në Dibër, Lezhë, Elbasan…

Pas 24 orësh intensive, situata e zjarreve në Shqipëri është stabilizuar plotësisht. Ministria e Mbrojtjes njofton se asnjë vatër zjarri nuk mbetet aktive apo nën mbikëqyrje në vend.

Të gjitha 10 vatrat e raportuara gjatë kësaj periudhe janë shuar me sukses në pesë qarqet e prekura. Ndërhyrjet u kryen në Dibër, Lezhë, Elbasan, Gjirokastër e Fier, falë bashkëpunimit të shumë strukturave.

Në operacione u angazhuan 174 forca operacionale dhe 14 automjete zjarrfikëse. Shtohet edhe mbështetja e Forcave të Armatosura me 27 efektivë, tri mjete dhe një ambulancë.

Në Dibër u fikën vatrat në Lundrë-Madhesh, Cerrujë/Mali i Allushit dhe Selishtë. Në Gjirokastër u neutralizua zjarri në Bularat të Dropullit, ku u angazhuan 18 efektivë të MZSH me 3 mjete, forca bashkiake, policore dhe ushtarake.

Edhe në qarqet e tjera u arrit kontrolli i plotë. Në Lezhë u shua vatra në Gallatë të Kurbinrit, që kishte ardhur nga territori i Matit. Në Elbasan u fik zjarri në Librazhd-Katund që kishte prekur pishat. Në Fier u neutralizuan vatrat në Bitaj të Lushnjës dhe në Rërë të Patosit.

Për këto ndërhyrje u angazhuan bashkitë, policia, shërbimi pyjor dhe strukturat e tjera. Agjencia Kombëtare e Mbrojtjes Civile vijon monitorimin e pandërprerë të situatës në të gjithë territorin. Kapacitetet operacionale mbeten në gatishmëri për çdo emergjencë të re.