Vjen reagimi i Zelenskyt pasi Trump njoftoi ‘një armëpushim energjetik’ ndërmjet Ukrainës dhe Rusisë

Zelensky reagon pasi Trump njofton armëpushim energjetik mes Ukrainës dhe Rusisë

Pak minuta pas deklaratës së presidentit amerikan Donald Trump, ka ardhur edhe reagimi i presidentit ukrainas Volodymyr Zelensky. Ai tha se armëpushimi energjetik “ishte një lajm për mua”.

Komenti erdhi menjëherë pasi Trump deklaroi se Kievi dhe Moska kishin rënë dakord për ndalimin e menjëhershëm të sulmeve ndaj infrastrukturës energjetike të njëra-tjetrës.

“Me efekt të menjëhershëm, në luftën mes Rusisë dhe Ukrainës hyn në fuqi një armëpushim energjetik. Të dyja palët kanë rënë dakord. Mos e shkelni”, shkroi Trump në platformën e tij Truth Social.

Në një prononcim për median amerikane Axios, Zelensky shtoi: “Por nëse rusët bien dakord për një armëpushim energjetik, edhe Ukraina do të pranojë”.

Ndërkohë, sipas raportimeve të mediave ndërkombëtare, të cituara nga ABC24.AL, Moska nuk ka dhënë ende asnjë qëndrim zyrtar për deklaratën e presidentit amerikan.

Më herët, kreu i shtetit ukrainas kishte deklaruar gatishmërinë e Kievit për të ndalur sulmet ndaj rafinerive ruse të naftës. Kushti, sipas tij, ishte që Moska të ndalte sulmet ndaj infrastrukturës energjetike të Ukrainës. Ai theksoi se çdo hap drejt uljes së tensionit duhet të jetë i dyanshëm dhe i shoqëruar me garanci.

Nga ana tjetër, presidenti amerikan e ka lidhur rritjen e çmimeve të karburanteve me luftën mes Rusisë dhe Ukrainës. Ai nuk e ka fajësuar për këtë konfliktin aktual që përfshin Iranin.

Njoftimi për armëpushimin energjetik pasoi marrëveshjen për furnizimin me naftë dizel. Trump e bëri publike atë të premten, pas takimit me presidentin rus Vladimir Putin. Sipas marrëveshjes, Moska pranoi të furnizojë me karburant SHBA-në dhe tregjet ndërkombëtare.

Zelensky e kundërshtoi këtë marrëveshje. Ai e cilësoi atë si një “dhuratë” për Putinin. Sipas tij, lehtësimi i kufizimeve për eksportet ruse të naftës dizel mund të financojë makinën luftarake të Moskës.