“Viza më e shtrenjtë, komike dhe brutale”- Berisha në SHBA, analisti Leka: Mbetet non grata, PD e përçarë me të në krye! Nuk vijnë më në pushtet

Analizuesi politik Martin Leka vlerëson se edhe pse kryetari i Partisë Demokratike, Sali Berisha, ka arritur të marrë vizën amerikane, statusi i tij i non gratës mbetet i pandryshuar. Leka shprehet se me kryesimin e Berishës, Partia Demokratike është thellësisht e përçarë dhe nuk ka mundësi të rikthehet në pushtet.

Gjatë një interviste për televizionin ABC News më 4 shtator, analisti theksoi se bllokimi i demokratëve do të vazhdojë sa kohë udhehiqen nga Berisha. Leka e cilësoi si pompim politik dhe krejtësisht joreale arritjen e kryedemokratit në Uashington.

“Ajo që po ndodh është shumë brutale dhe komike. Berisha e shet udhëtimin si një ngjarje të madhe, sikur të shkonte të bëhej president i Shteteve të Bashkuara të Amerikës. Për të vetën, besoj se kjo është viza më e shtrenjtë ndonjëherë. Thuhet se kushtoi rreth 6 milionë euro, plus shuma të tjera të investuara në lobim. Kjo është një provë tjetër se sa larg ka mbetur PD nga rruga e saj drejt sundimit të ligjit dhe pushtetit real”, u shpreh Leka.

Sipas analistit, pesha politike e një figure të shpallur non grata është tashmë e ezauruar. Berisha, vijoi ai, i ka absorbuar të gjitha pasojat negative të këtij statusi, duke e kthyer PD-në në një subjekt të brishtë dhe të copëtuar nga brenda.

“PD aktualisht nuk dominon në skenën politike dhe nuk ka pretendime serioze për t’u rikthyer në pushtet. Forca politike do të vijojë të zbehet dhe të shuhet, njësoj siç do të mbarojë dhe vetë jeta politike e Sali Berishës me kalimin e viteve”, përfundoi Leka.