VIDEO/ Mungon dakordësia në BE për mbylljen e “Kapitullit 20”? Ibrahimaj: I kemi përmbushur detyrimet!

Ministrja e Ekonomisë dhe Inovacionit, Delina Ibrahimaj, ka folur për ecurinë e negociatave me Bashkimin Evropian. Në qendër të komenteve ishte mbyllja e përkohshme e Kapitullit 20 dhe çështja e fondeve IPARD. Deklaratat u bënë pas përfundimit të mbledhjes së qeverisë.

Ajo u pyet nëse ekzekutivi kishte informacion mbi bisedimet që po zhvillohen në grupin e punës COELA. Atje vendet anëtare të BE-së po diskutojnë qëndrimin e përbashkët ndaj Shqipërisë. Ibrahimaj u përgjigj se takimet e COELA-s nuk janë të hapura për publikun.

Ministrja u shpreh optimiste për ecurinë e dosjes. Sipas saj, Shqipëria i ka përmbushur plotësisht detyrimet për këtë kapitull. Mbyllja pritet së shpejti.

“Mbledhjet e COELA-s janë mbledhje me dyer të mbyllura. Ne jemi shpresëplotë që Kapitulli 20, për të cilin ne imungon ende dakordësia në BE për Shqipërinë do të mbyllet shumë shpejt. Shpresa jonë është që shumë shpejt ai do të mbyllet”, u shpreh Ibrahimaj.

Vëmendje iu kushtua edhe programit IPARD. Ibrahimaj bëri të ditur se vendi ndodhet në hapat e fundit për riakreditimin. Kjo procedurë do të mundësojë zhbllokimin e financimeve për bujqësinë.

Procesi, sipas saj, ka zgjatur. Është dashur të përgatitet dhe të dorëzohet një volum i madh dokumentacioni. Tani gjithçka është drejt finalizimit.

“Ne presim finalizimin e procedurave për riakreditimin për dhënien e fondit IPARD. Patjetër që është një proces i cili ka qenë i zgjatur. Kemi pasur dokumentacione për të dorëzuar, por është në fazat finale të tij. Presim që shumë shpejt fondet do të hapen”, deklaroi ministrja.

Ajo e cilësoi IPARD-in si instrument kyç për sektorin. Fondi ndikon drejtpërdrejt në zhvillimin e bujqësisë. Vështirësitë e hasura, theksoi Ibrahimaj, nuk kanë qenë vetëm rast i Shqipërisë.

“Është një fond shumë i rëndësishëm, i cili ndikon në gjithë zhvillimin e bujqësisë. Shqipëria nuk është vendi i vetëm që ka pasur probleme me IPARD dhe tashmë ato janë të zgjidhura”, tha Ibrahimaj.

Ndërkohë, mes shteteve anëtare të BE-së nuk u arrit dje dakordësia për mbylljen e përkohshme të Kapitullit 20 me Shqipërinë. Diskutimet u zhvilluan në grupin COELA, pa rezultat konkret.

Çështja mbetet e hapur. Ajo do të diskutohet sërish sot në të njëjtin format. Përfaqësuesit e vendeve anëtare do të kërkojnë unifikimin e qëndrimit ndaj Tiranës.

Kapitulli 20 mbulon fushën e “Sipërmarrjes dhe Politikës Industriale”. Ai bën pjesë te Klasteri 3, “Konkurrueshmëria dhe rritja gjithëpërfshirëse”. Dokumentet e Këshillit tregojnë se presidenca ka paraqitur një propozim kompromisi. Dosja vijon të shqyrtohet në COELA.

Shqipëria synon ta mbyllë përkohësisht këtë kapitull. Më herët si datë e mundshme për një konferencë ndërqeveritare është përmendur 13 tetori. Megjithatë, çdo avancim varet nga mbyllja e bisedimeve dhe dakordësia e plotë mes anëtarëve.