VIDEO/ Dhunoi Eduart Kuçin, momenti kur arrestohen Jozefin Marku dhe shoku i tij! Policia: U fsheh në tualet, përballet me 5 akuza! Dy në kërkim

Njoftimi zyrtar nga Policia e Shtetit dha sot (5 shtator) sqarime të plota për ngjarjen dhe arrestimet e kryera. Ndër personat e ndaluar është ish-banori i Big Brother VIP Albania, Jozefin Marku, i cili u kap brenda tualetit të një banese.

Hetuesit e Drejtorisë Vendore të Policisë Tiranë, në bashkëpunim me atë të Lezhës, sekuestruan prova dhe identifikuan të përfshirët. Në prangat e tyre ra edhe Kristjan Nikolli, 31 vjeç. Gjithashtu u lëshuan urdhra për kapjen e Anton Hulit dhe Kristjan Vatës.

“Akoma janë në arrati dy të dyshuar të tjerë,” njoftoi policia.

Dokumentimi i plotë i ngjarjes çoi në ndalimin e Jozefin Markut, 30 vjeç. Prokuroria e akuzon për pesë vepra penale, mes tyre privim të paligjshëm të lirisë, plagosje të lehtë me dashje, kanosje, mbajtje pa të drejtë të uniformës dhe ndërhyrje në jetën private.

Kristjan Nikolli dyshohet se drejtonte automjetin “Land Rover” të përdorur në ngjarje. Ai përballet me akuza më të rënda, përfshirë edhe prodhim dhe mbajtje pa leje të armëve dhe municioneve.

Në shtëpinë e Nikollit, efektivët gjetën dhe sekuestruan municion si dhe automjetin. Sipas hetimeve, grupi ka dhunuar një 26-vjeçar, duke pretenduar se ai kishte fyer njërin prej tyre.

Policia vijon punën për kapjen e të shpallurve në kërkim dhe identifikimin e personave të tjerë të mundshëm të përfshirë. Materialet hetimore i kanë kaluar tashmë Prokurorisë për hapa të mëtejshme ligjore.