VIDEO/ Ambasadori amerikan Eric Wendt nis zyrtarisht detyrën në Tiranë! Pas takimit me Begajn, të mërkurën me ministrin e Jashtëm dhe të premten ceremonia e prezantimit

Ambasadori i ri amerikan në Shqipëri, Eric Wendt, ka marrë zyrtarisht detyrën këtë të shtunë.

Që në orët e para në Tiranë, ai u takua me kreun e shtetit. Në Pallatin e Brigadave i dorëzoi Presidentit Bajram Begaj letrat kredenciale, brenda më pak se 24 orëve nga mbërritja. Takimi vijoi me një bisedë kokë më kokë mes dy zyrtarëve.

Wendt vjen në krye të misionit diplomatik me një karrierë të gjatë në siguri dhe mbrojtje. Ai numëron mbi 34 vite shërbim në ushtrinë amerikane. Pjesën kryesore të karrierës e ka kaluar në Forcat Speciale "Green Berets". Gjithashtu ka mbajtur poste të rëndësishme në strukturat e operacioneve speciale të NATO-s.

Prioritetet e tij në Shqipëri i bëri publike që më 20 maj, gjatë dëgjesës në Senatin amerikan. Në krye të listës renditi luftën kundër korrupsionit, krimit të organizuar dhe trafikimit të drogës. Po ashtu theksoi forcimin e bashkëpunimit në mbrojtje dhe në sigurinë kibernetike.

Vëmendje të veçantë i kushtoi SPAK-ut. Ambasadori shprehu mbështetje të qartë për Strukturën e Posaçme Kundër Korrupsionit dhe Krimit të Organizuar. Ai vlerësoi bashkëpunimin e këtij institucioni me agjencitë amerikane të zbatimit të ligjit. Sipas tij, puna e SPAK-ut është thelbësore për goditjen e korrupsionit dhe krimit të organizuar. Kjo, për sa kohë që institucioni mbetet i pavarur dhe i mbrojtur nga çdo ndikim politik.

Ditët e para të mandatit do të jenë intensive sa i përket takimeve institucionale. Të mërkurën është parashikuar takimi i parë me ministrin për Evropën dhe Punët e Jashtme, Ferit Hoxha. Ndërkohë të premten, më 2 tetor, ambasada amerikane në Tiranë do të mbajë ceremoninë zyrtare të prezantimit të tij.

Wendt merr drejtimin e përfaqësisë amerikane në një moment kyç për marrëdhëniet mes dy vendeve. Në qendër mbeten bashkëpunimi strategjik, sundimi i ligjit dhe betejat e përbashkëta kundër korrupsionit e krimit të organizuar.