Vetura përplaset në turmën në Doncaster të Britanisë, dy të vdekur dhe katër të lënduar

Ngjarja tragjike në rrugët e Doncasterit la dy të vdekur dhe katër të plagosur rëndë pasi një automjet u fut në turmën e këmbësorëve.

Drejtuesi i mjetit u prangos menjëherë nga policia. Ai më vonë u lirua me kusht teksa hetimet vazhdojnë ende.

Aksidenti ndodhi rreth orës 11:00 të së dielës në White Rose Way. Për shkak të përplasjes së rëndë, në vendin e ngjarjes mbërritën shërbimet e urgjencës, përfshirë edhe një helikopter të ambulancës ajrore.

Sipas njoftimit zyrtar të Policisë së South Yorkshire, fillimisht një Mitsubishi L200 i zi goditi katër persona që ecnin në këmbë. Më pas, vozitësi humbi kontrollin dhe automjeti i tij u përplas me një Audi të zi dhe një BMW të argjendtë që po udhëtonin në kahun e kundërt të rrugës.

Përpjekjet e ekipit mjekëor për t'i shpëtuar dy prej këmbësorëve dështuan. Ata u konfirmuan të vdekur në vendngjarje.

Katër persona të tjerë u transportuan menjëherë në spital. Plagët e tyre ishin të rënda, por sipas mjekëve, jeta e tyre nuk ishte në rrezik.

Autoritetet identifikuan drejtuesin e Mitsubishi-t si një burrë 30-vjeçar. Ai u arrestua dhe akuzohet për dy krime të shkaktimit të vdekjes përmes drejtimit të rrezikshëm. Gjithashtu rëndohet me dy akuza të tjera për shkaktim të plagosjeve të rënda dhe drejtim automjeti në gjendje të papërshtatshme.

Hetuesit konfirmuan lierjen e tij me kusht pas intervistimit. Në paralel, është hapur një hetim i gjerë për të sqaruar të gjitha rrethanat.

Policia u bëri thirrje publikut. Çdo dëshmitar që ka parë diçka, apo edhe vozitës me pamje nga kamerat e makinave, u kërkua të kontaktojë autoritetet. Informacionet e tyre mund të jenë vendimtare për rindërtimin e plotë të minutave para dhe gjatë aksidentit.