Vetëm dy muaj në krye të Ujësjellës-Kanalizimeve, drejtori largohet nga detyra, ja kush e zëvendëson!

Pas vetëm dy muajsh në krye të Ujësjellës-Kanalizimeve të Durrësit, Migen Duka është larguar nga detyra. Në vend të tij është emëruar Albi Lika. Ky rotacion shënon ndryshimin e dytë brenda pak muajsh në drejtimin e SHRUKD-së. Për largimin e Dukës nuk ka ende asnjë shpjegim zyrtar nga ndërmarrja.

Drejtuesi i ri u prezantua këtë të hënë para punonjësve. Në takim ishte i pranishëm edhe drejtori i përgjithshëm i Agjencisë Kombëtare të Ujësjellës-Kanalizimeve, Fludian Çuka.

Albi Lika vjen nga sektori privat. Ai është inxhinier elektrik dhe ka punuar më herët në Autoritetin Portual të Durrësit. Që prej tetorit të vitit 2017, ai drejton si administrator dhe bashkëthemelues kompaninë “Electrical & IT Solution”, e cila operon në fushën e punimeve civile dhe elektrike.

Migen Duka, me origjinë nga Elbasani, është inxhinier i ri hidroteknik dhe biznesmen. Ai u emërua në gusht, kur zëvendësoi Olsen Kavallin.

Deri më tani SHRUKD nuk ka sqaruar arsyet e largimit të tij pas një mandati kaq të shkurtër. Rotacioni i shpeshtë në krye të ndërmarrjes mbetet pa shpjegim. Motivet e këtyre lëvizjeve janë ende të paqarta.