Vendosi bombë të rremë te karburanti dhe i vendosi gjobë 50 mijë euro në kripto biznesmenit, RENEA arreston 21-vjeçarin në Dibër! Ja çfarë e tradhtoi

Alarmi për bombë në një karburant në Dibër doli të ishte i rremë, ndërsa autori i dyshuar u arrestua brenda pak orësh.

21-vjeçari kishte vendosur në ambientet e biznesit një kuti me ekran, tela dhe elementë elektronikë. Objektin e kishte paraqitur si mjet shpërthyes me telekomandë. Krahas tij kishte lënë një letër kërcënuese. Në të kërkonte 50 mijë euro në kriptomonedhë, si një lloj gjobe ndaj pronarit.

Shuma duhej paguar përmes një pike këmbimi kriptomonedhash, në adresën e caktuar prej tij. Në të kundërt, paralajmëronte shpërthimin.

Ngjarja u shënua më 2 tetor 2026, rreth orës 14:30. Kutia u vendos në një karburant në pronësi të shtetasit Z. Sh. Mbi të ishte montuar një ekran dhe pjesë elektronike që krijonin idenë e një pajisjeje shpërthyese. Autori pretendonte se brenda kishte lëndë plasëse C4, sensorë që reagonin ndaj lëvizjes dhe sistem telekomandimi. Sipas letrës, zona mbahej nën vëzhgim me kamera.

Në mesazh thuhej se shpërthimi do të ndodhte nëse pagesa nuk kryhej në afatin e vendosur. E njëjta gjë do të ndodhte nëse kutia prekej, zhvendosej apo nëse njoftohej policia.

Menjëherë pas sinjalizimit, në vendngjarje shkuan shërbimet e Komisariatit të Policisë Dibër. Ato vepruan së bashku me Sektorin për Hetimin e Krimeve të Rënda dhe strukturat Operacionale të Drejtorisë Vendore të Policisë Dibër. Operacioni u kodua “Kërcënimi”.

Forcat xheniere të RENEA-s hapën dhe kontrolluan kutinë. Verifikimi tregoi se brenda nuk kishte asnjë lëndë shpërthyese.

Hetimi i shpejtë çoi te identifikimi i autorit të dyshuar. Bëhet fjalë për shtetasin E. K., 21 vjeç. Ai u kap dhe u arrestua në flagrancë. Akuza ndaj tij është “shtrëngimi me anë të kanosjes ose dhunës për dhënien e pasurisë”.

Policia thotë se zbardhja u bë e mundur falë disa provave. U sekuestruan pamjet e kamerave të sigurisë. U analizuan lëvizjet përmes qelizave telefonike dhe të dhënat e gjeolokimit. Në provat shkencore u përfshi edhe ekzaminimi i kaligrafisë së letrës kërcënuese.

Nën drejtimin e Prokurorisë vijon puna për zbardhjen e plotë të rrethanave. Hetuesit po verifikojnë edhe nëse ka persona të tjerë të përfshirë.

Materialet procedurale i janë referuar Prokurorisë së Dibrës për veprime të mëtejshme.