Vendimi për Veliajn/ Avokati: Do përdorim çdo mjet juridik, nuk mund ta mundin politikisht përmes ‘lawfare’-it

Avokati Plarent Ndreca, i cili mbron kryebashkiakun Erion Veliaj, ka shprehur shqetësim të thellë pas vendimit të Gjykatës së Lartë. Gjykata la në fuqi masën "arrest në burg" për kryetarin e Bashkisë së Tiranës. Mbrojtja e cilëson këtë vendim si një goditje për shtetin e së drejtës dhe demokracinë.

Në një deklaratë zyrtare, Ndreca theksoi se kjo vendimmarrje është në kundërshtim me detyrimin ligjor për të zbatuar aktin e Gjykatës Kushtetuese. Kjo e fundit, sipas tij, e kishte shfuqizuar më parë vendimin në fjalë. “Ky akt praktikisht e ka lënë pa efekt autoritetin më të lartë kushtetues”, u shpreh ai.

Avokati ngriti pyetjen se çfarë vlere kanë garantitë kushtetuese nëse nuk ekzekutohen. Ai shtoi se shkaqet e këtij akti duhen kërkuar jashtë fushës së argumentit juridik. Për Ndreca, pasojat shkojnë përtej çështjes individuale të zotit Veliaj.

“Mandati i kryetarit të zgjedhur mbahet peng”, vijoi ai, duke kujtuar se prej 19 muajsh Tirana është pa kryetar. Ndreca këmbënguli se klienti i tij vazhdon të prezumohet i pafajshëm, ndonëse hetimeve iu dha fund prej një viti dhe çështja tashmë gjykohet.

Megjithatë, sipas mbrojtjes, kjo nuk është arsye për dorëzim. “Mund ta kufizojnë zërin, por jo fitoren politike përballë qytetarëve”, u shpreh Ndreca. Ai e cilësoi këtë situatë si një përpjekje për të mundur politikisht përmes të ashtëquajturit “lawfare”.

Plarent Ndreca paralajmëroi se do të shfrytëzojë çdo rrugë ligjore të mundshme. Kjo përfshin mjetet e parashikuara nga Kushtetuta, ligjet e brendshme dhe instrumentet ndërkombëtare të të drejtave të njeriut.

Në përfundim, avokati bëri thirrje për një drejtësi me standarde evropiane. Sipas tij, ajo duhet të garantojë të drejtat themelore, të respektojë vendimet kushtetuese dhe të mbrojë demokracinë. Ndreca e mbylli deklaratën duke nënvizuar se demokracia është mjeti më i lartë që populli ka për të vendosur për përfaqësuesit dhe udhëheqësit e tij.