Vangjeli: Evropa ka ndryshuar, po ashtu dhe qëndrimi i saj ndaj Shqipërisë

Analisti Lorenc Vangjeli thotë se Evropa nuk është më ajo e dikurshmja. Komentin e bëri në emisionin "Trialog" të Alba Alishanit në RTSH24. Sipas tij, ky transformim thelbësor ka prekur edhe raportin e kontinentit me Shqipërinë.

Vangjeli u ndal te periudha përpara nisjes së luftës në Ukrainë. Atëherë, sipas tij, Brukseli sillej në mënyrë cinike, egoiste, ksenofobe dhe arrogante. Sot, theksoi ai, qëndrimi është krejt ndryshe.

"Evropa e djeshme, pra, Evropa e cila kishte filluar të ishte, le të themi, të vendosim edhe një afat kohor përpara fillimit të luftës në Ukrainë, cinike, egoiste, ksenofobe dhe arrogante. Pra, kjo Evropa e djeshme, këtë dikotominë mes korrupsionit dhe luftës së tij, do ta shikonte me një sy tjetër dhe do thoshte, po, Shqipëria ka korrupsion endemik. Dhe ky është një problem i madh i cili duhet të adresohet. Evropa e sotme… Jo, jo, jo, jo, dëgjo, Evropa e sotme, për arsye nga më të ndryshmet, por sepse ka ndryshuar natyra e saj, thotë që dakord korrupsioni, por sukses është lufta që ju i bëni asaj. Duket sikur janë dy anë të të njëjtës medalje, dy të vërteta të cilat ekzistojnë veç e veç, por dhe e kundërshtojnë njëra-tjetrën", deklaroi Vangjeli.

Sipas analistit, kjo kthesë lidhet drejtpërdrejt me luftën në kufijtë lindorë të kontinentit. Ajo pasqyron edhe realitetin e ri gjeopolitik. Në këtë kontekst, ai kujtoi se në gjeopolitikë nuk ka boshllëk.

"Nuk është e njëjta Evropë, pra, ky është problemi. Sot Evropa, duke nisur, thashë edhe një herë, me problemin shumë të madh të luftës në kufijtë e saj lindorë, me probleme shumë herë më të mëdha, por edhe me filozofinë që nuk ka boshllëk… në gjeopolitikë nuk ka boshllëk. Dhe në një rajon të trazuar si i Ballkanit, nëse do të mungonin aktorët e Perëndimit, aktorët kryesorë të Perëndimit, pra BE-ja dhe Shtetet e Bashkuara, fuqi jomiqësore, qoftë me BE-në, qoftë me Shtetet e Bashkuara, do të kishin terren për të hyrë, për të ndërhyrë. Pra, është një Evropë e ndryshuar, që na jep këtë përqasje të ndryshuar, që kryeministri mund ta marrë për politikën e ditës si një dekoratë, por kjo nuk ndryshon asgjë në realitetin tonë. Dhe mund të thuhet që sërish, edhe një herë, e vërteta alternative e zonjës von der Leyen, është e vërtetë", tha Vangjeli.

Ndërsa Brukseli ka zbutur tonet, Uashingtoni ruan linjën tradicionale. Departamenti Amerikan i Shtetit, sipas Vangjelit, mbetet më pranë realitetit. Ai vazhdon të vërë theksin te korrupsioni, emigracioni, pastrimi i parave dhe krimi i organizuar.