Vance shpreh dyshime për transmetimin drejtpërdrejt të ekzekutimit të autorit të masakrës në Fort Hood

Vance shpreh dyshime për transmetimin drejtpërdrejt të ekzekutimit të autorit të masakrës në Fort Hood

Plani për ta shfaqur publikisht ekzekutimin e autorit të masakrës në Fort Hood po has në kundërshtim gjithnjë e më të madh. Rezerva ka shprehur edhe nënpresidenti JD Vance, ndërsa kritika të forta kanë ardhur nga kleri dhe nga ligjvënës të të dyja krahëve.

Në korin e kundërshtarëve u rreshtua edhe kreu i Konferencës së Peshkopëve Katolikë të SHBA-së, kryepeshkopi Paul S. Coakley. Të premten në mëngjes ai tha se lajmin e kishte pritur me tronditje dhe pikëllim të thellë. “Me tronditje dhe pikëllim të madh mësova për vendimin e Departamentit të Luftës për ta transmetuar publikisht ekzekutimin”, deklaroi ai. Nismën e cilësoi si “promovim barbar të një kulture të vdekjes” dhe kërkoi rishikimin e saj, transmeton ABC24.AL.

Dritën jeshile për ekzekutimin e Hasanit me pushkatim e dha presidenti Donald Trump. Vendimi erdhi vetëm pak ditë pas një tentative të dështuar për të ekzekutuar me injeksion vdekjeprurës Christa Pike-n, në fund të muajit të kaluar. Pas atij episodi, guvernatori i Tennessee-t pezulloi ekzekutimet e tjera në shtet për pjesën e mbetur të vitit.

Sekretari i Mbrojtjes, Pete Hegseth, kujtoi se ushtria amerikane nuk ka pushkatuar asnjë pjesëtar të shërbimit që nga Lufta e Dytë Botërore. Rasti i fundit i një ekzekutimi nga forcat e armatosura amerikane mbetet ai i 13 prillit 1961, kur u var ushtari John Bennett.

Plani i Pentagonit është pritur me kritika të gjera në Kongres. Ligjvënës republikanë dhe demokratë e kanë quajtur idenë e transmetimit të neveritshme dhe kanë kërkuar anulimin e saj.

Senatori republikan Thom Tillis nga Karolina e Veriut tha se propozimi shkon “Përtej çdo kufiri të neverisë”. Ai shtoi: “Ekzekutimet publike janë ato që bëjnë diktaturat shtypëse si Irani dhe Afganistani. Kjo nuk duhet të ndodhë në Amerikë”.

Sipas ligjvënësve, një spektakël i tillë i ngjan praktikave autoritare. Ai bie ndesh me vlerat amerikane dhe me parimet e sistemit të drejtësisë, theksuan ata. Po ashtu paralajmëruan se transmetimi mund të nxisë akte hakmarrëse ndaj ushtarakëve amerikanë dhe civilëve jashtë vendit.

Senatori demokrat i Virginias, Mark Warner, anëtari më i lartë demokrat në Komitetin e Inteligjencës, kritikoi planin e Hegseth-it. Ai vuri në dukje se “pothuajse asnjë vend në botë” nuk e zbaton më këtë praktikë.

Edhe senatorja republikane Lisa Murkowski nga Alaska i kërkoi Pentagonit ta rishqyrtojë vendimin. Ajo nënvizoi rëndësinë e mënyrës sesi Shtetet e Bashkuara zbatojnë drejtësinë.

Shqetësim ngriti edhe senatori republikan John Curtis nga Utah. Sipas tij, transmetimi rrezikon të ushqejë interesin për dhunën si argëtim. Ai e krahasoi me spektaklet e përgjakshme të Romës së lashtë. “E nxis ta rishqyrtojë vendimin”, tha Curtis. /ABC24.AL/