Ushtria e Jemenit thotë se ka “siguruar” korridorin detar të Detit të Kuq

Forcat qeveritare të Jemenit njoftuan marrjen nën kontroll të ngushticës strategjike Bab al-Mandab. Mbështetur nga Arabia Saudite, ato po zhvillojnë një ofensivë të gjerë kundër kryengritësve Houthi, që mbështeten nga Irani.

Operacioni është pagëzuar “Agimi i Jemenit”. Objektivi i tij është rikuperimi i territoreve dhe institucioneve të shtetit që ndodhen nën kontrollin e Houthive, përfshirë kryeqytetin Sana, raporton ABC24.AL.

Sipas njoftimit të ushtrisë jemense, Brigadat Giants dhe Nation’s Shield kanë hyrë në zonën e Bab al-Mandabit. Ato morën edhe aeroportin ushtarak të Dhubabit. Në të njëjtën kohë u shkëput lidhja rrugore mes Dhubabit dhe qytetit Mokha. Ushtria pretendon se qindra luftëtarë Houthi kanë mbetur të rrethuar aty.

Pala qeveritare deklaroi gjithashtu se ka rimarrë Mokhan, portin me rëndësi strategjike në Detin e Kuq. Por versionet nuk përputhen. Burime qeveritare dhe ushtarake, të cituara nga agjencitë ndërkombëtare, thonë se trupat mund të kenë mbërritur vetëm në periferi të qytetit.

Ofensiva tokësore shoqërohet me sulme intensive nga ajri. Koalicioni i drejtuar nga Riadi bëri të ditur se rreth 100 avionë luftarakë po japin mbështetje. Sipas tij, janë goditur 324 objektiva të konsideruara me vlerë të lartë.

Nga krahu tjetër, Houthit pretendojnë se kanë goditur caqe brenda Arabisë Saudite. Në listë përmenden aeroporti ndërkombëtar i Riadit dhe instalime të gjigantit të naftës Saudi Aramco. Dëmet e pretentuara nuk janë konfirmuar nga burime të pavarura.

Përshkallëzimi ka shtuar shqetësimet për sigurinë ajrore dhe lundrimin detar në rajon. Houthit paralajmëruan se hapësira ajrore saudite nuk është më e sigurt për aviacionin civil. Përjashtim bëjnë vetëm zonat mbi qytetet e shenjta Mekë dhe Medinë.

Ndërkohë në Riad u mbajt një takim urgjent trepalësh. Arabia Saudite, Turqia dhe Pakistani diskutuan aktivizimin e mekanizmave të mbrojtjes së përbashkët. Në tryezë ishte edhe çështja e dërgimit të forcave ushtarake në territorin saudit.

Sekretari i Përgjithshëm i OKB-së, António Guterres, dënoi sulmet ndërkufitare të Houthive ndaj Arabisë Saudite. Ai shprehu shqetësim të thellë për përshkallëzimin e luftimeve.

Bab al-Mandab mbetet një nga nyjat më kritike të lundrimit global. Ai lidh Detin e Kuq me Gjirin e Adenit dhe Detin Arabik. Përmes tij kalon një pjesë e madhe e tregtisë ndërkombëtare dhe e transportit të energjisë.

Konflikti në Jemen shpërtheu në vitin 2014, kur Houthit morën Sananë. Një vit më pas, në 2015, Arabia Saudite ndërhyri ushtarakisht në krah të qeverisë së njohur ndërkombëtarisht.

Pas një periudhe të gjatë qetësie relative, luftimet u rindezën. Në shtator, Houthit nisën një ofensivë të shpejtë në bregdetin jugperëndimor. Ata morën zona pranë Bab al-Mandabit, duke përfshirë Mokhan dhe ishullin Perim.

Tani forcat qeveritare, me mbështetjen e Riadit, synojnë të rimarrin korridorin strategjik dhe të avancojnë drejt Sanasë. Pretendimet e të dy palëve për ecurinë në terren vijojnë të jenë kontradiktore. /ABC24.AL/