Ushtarëve amerikanë në Okinawa u vendoset shtetrrethim pas vrasjes së një gruaje

Shtetrrethim njëmujor për forcat amerikane në Okinawa pas vrasjes së dyshuar të një gruaje

Komanda amerikane në Okinawa ka vendosur shtetrrethim njëmujor për efektivët e saj dhe ka ndaluar konsumimin e alkoolit. Masa u mor pas dyshimeve se një marins amerikan vrau një grua japoneze.

I dyshuari është 20-vjeçari Devin Jacob Ballard. Ai akuzohet se ka vrarë 39-vjeçaren Anna Yagi brenda një hoteli në Naha, kryeqyteti i ishullit. Policia thotë se nga viktima dyshohet se janë marrë edhe portofoli dhe çanta e shpinës. I dyshuari i ka mohuar akuzat.

Pas ngjarjes, ushtria amerikane shpalli një paketë masash disiplinore për trupat në Okinawa. Krahas shtetrrethimit dhe ndalimit të alkoolit, të gjitha operacionet ushtarake në ishull do të ndërpriten për 48 orë. Gjithashtu, ushtarët do të kalojnë në seanca trajnimi për disiplinën dhe normat e sjelljes.

Gjenerallejtënant Benjamin Watson deklaroi se çdo incident që prek komunitetin vendas cenon besimin dhe raportet mes Shteteve të Bashkuara dhe Japonisë, raporton wp.

Kryeministrja e Japonisë, Sanae Takaichi, e dënoi ngjarjen. Ajo e cilësoi vrasjen si “jashtëzakonisht brutale dhe të neveritshme”. Takaichi tha se Tokio i ka kërkuar Uashingtonit të marrë masa për të shmangur përsëritjen e rasteve të tilla.

Sipas policisë, Yagi ndërroi jetë nga asfiksia. Dyshohet se Ballard i kishte ushtruar presion në qafë. Trupi i saj u zbulua nga punonjësit e hotelit, pasi ajo nuk ishte larguar nga dhoma në orarin e parashikuar.

Ngjarja ka rindezur shqetësimin në Okinawa për praninë e gjerë ushtarake amerikane. Ishulli strehon pjesën më të madhe të rreth 18 mijë marinsave amerikanë të vendosur në Japoni.

Prania e forcave amerikane atje ka nxitur prej vitesh debate dhe protesta mes banorëve. Incidente të ndryshme me përfshirjen e ushtarakëve amerikanë kanë shtuar kërkesat për rregulla më të forta disiplinore. /ABC24.AL/