Urdhri i kryeministrit Edi Rama, dorëhiqet edhe Drejtori i Përgjithshëm i Doganave, Besmir Beja!

**Urdhri i Ramës, jep dorëheqjen edhe kreu i Doganave, Besmir Beja**

Besmir Beja, Drejtori i Përgjithshëm i Doganave, ka dorëzuar dorëheqjen nga detyra. Vendimi duket se vjen pas urdhrit që kryeministri Edi Rama u dha ministrave të enjten pasdite: të kërkojnë largimin e drejtorëve të agjencive shtetërore, si në Tiranë ashtu edhe në rrethe, të cilat varen prej tyre.

Burimet qeveritare pohuan për Top Channel se drejtuesit e prekur nuk largohen menjëherë. Faza e parë e operacionit ka të bëjë vetëm me anën administrative, përmes një shkrese dorëheqjeje, dhe ata vijojnë të qëndrojnë në detyrë.

Faza e dytë parashikon analizimin e performancës së çdo drejtori që ka dhënë dorëheqjen. Për këtë valë kërkesash qeveria nuk ka komentuar deri më tani.

Të njëjtat burime sqaruan se lëvizja lidhet me idenë e kryeministrit për meritokraci në administratë. Sipas tyre, kështu i hapet rruga ministres së Administratës Publike, Adea Pirdeni, e cila u votua dje në parlament dhe u betua sot në Presidencë.

Mbi 130 drejtues agjencish, në nivel qendror e lokal, duhet të dorëzojnë dorëheqjen e kërkuar. Nuk bëhet fjalë për një rast të izoluar. Kërkesa të tilla janë bërë edhe në vitin 2021 dhe në vitin 2023.