Ukrainasi i shumëkërkuar për trafik droge u arrestua në Rinas, Ambasada e SHBA-ve ndan detajet e operacionit!

Një shtetas nga Ukraina i kërkuar nga drejtësia në Kiev është vënë në pranga në Aeroportin Ndërkombëtar të Tiranës.

Bëhet fjalë për Anatolii Streletskyi. Ai dyshohet për trafik të lëndëve narkotike në kuadër të një organizate kriminale.

Arrestimi u krye pak ditë më parë në Rinas. Operacioni u realizua falë bashkëpunimit mes autoriteteve shqiptare, Ambasadës së Shteteve të Bashkuara në Tiranë dhe palës ukrainase. Informacioni u shkëmbye në kohë reale.

Lajmi u konfirmua nga vetë Ambasada amerikane. Në njoftimin e saj theksohet se ndalimi u bë i mundur pas koordinimit me Njësinë e Hetimeve Penale Ndërkombëtare të Shërbimit të Sigurisë Diplomatike pranë selisë diplomatike amerikane.

Menjëherë pas shkëmbimit të të dhënave, Policia e Shtetit ndërhyri dhe arrestoi ukrainasin. Ai ishte shpallur në kërkim nga autoritetet në Kiev.

Aktualisht Interpol Tirana po punon me homologët në Ukrainë për të nisur procedurat e ekstradimit.

Ambasada e SHBA-së nënvizon se ky rast tregon partneritetin në veprim. Sipas saj, shkëmbimi i informacionit, mbështetja për institucionet e zbatimit të ligjit dhe puna e përbashkët janë thelbësore për goditjen e krimit transnacional dhe për garantimin e sigurisë së komuniteteve.