U shfaq në videot intime, këngëtarja kërkon ndjesë publike: Sot nuk dua të mbrohem, dua të kërkoj falje!

Blerina Matraku ka reaguar publikisht pas bujës së krijuar nga videot intime ku shfaqet krah kompozitorit Adrian Hila. Këngëtarja zgjodhi të kërkojë ndjesë, jo të mbrohet.

Në mesazhin e saj ajo u shpreh: "Sot nuk dua të mbrohem, dua të kërkoj falje. I drejtohem së pari publikut, çdo individi që është tronditur, lënduar apo ndjerë i prekur nga kjo situatë. Ju kërkoj ndjesë me përulësi dhe vërtetësi".

Matraku bëri edhe një thirrje të drejtpërdrejtë për ndalimin e shpërndarjes së pamjeve. "Sot ju lutem publikisht 'Mjaft'. Mos shpërndani më. Gabimi kërkon përgjegjësi, të cilën po e marr mbi supe dhe po e paguaj çnjerëzisht. Dhimbja kërkon respekt. Mjaft ju lutem. Jam njeri që më është cenuar privatësia", tha ajo.

Në deklaratën e plotë, artistja kërkon që publiku të shkëputet për një moment nga imazhet. Ajo thotë se ato nuk përfaqësojnë askënd, por cenojnë këdo. Përtej tyre, sipas saj, qëndron një njeri që po kalon provën më të vështirë. Një sfidë me përgjegjësi të madhe shoqërore dhe morale.

Ajo theksoi se nuk është aty për të dhënë justifikime. Qëllimi i saj, siç shprehet, është marrja e përgjegjësisë personale. Kërkoi ndjesë edhe për besimin që dha në momentet më të brishta të jetës. Një besim që, sipas saj, u keqpërdor për arsye ende të paqarta dhe të paidentifikuara.

Ndjesë kërkoi veçanërisht për Klaudia-n dhe vajzat e saj. Për çdo lot dhe dhimbje të shkaktuar. Ajo u shpreh se kjo është një fjalë që do të paguhet me drejtësi hyjnore.

Pavarësisht se privatësia i është cenuar në mënyrë çnjerëzore, Matraku tha se mban përgjegjësinë e veprimeve të saj. U shpreh se po i përjeton pasojat sikur t'i paguante me jetë. Ajo e përshkroi veten si një artiste me profil modest. Pa famë, pa çmime dhe pa mbështetje.

Në rrëfimin e saj, Matraku tha se është një grua që i është dashur t'i përballojë e vetme sfidat. Shpesh, shtoi ajo, i është dashur të buzëqeshë ndërsa lotët në sy i ka paraqitur si lot gëzimi.

Në fund të mesazhit, këngëtarja e mbylli me fjalët "Përulësisht, Blerina Matraku". Ajo shtoi se shpreson ta ketë përcjellë mesazhin. E ka shumë të vështirë të gjejë fjalët në këto momente, tha ajo.