U prangos në Greqi! Kush është trafikanti i kokainës që kërkohej nga Shqipëria për vrasje?

Policia e Greqisë nuk ka bërë publikë ende emrat e të arrestuarve në aksionin e madh kundër trafikut të drogës, zhvilluar gjatë dy ditëve të fundit në bashkëpunim me agjencinë amerikane DEA. Operacioni, i quajtur “Lulet e së keqes”, synonte shkatërrimin e një rrjeti kriminal me origjinë shqiptare, i përfshirë në transportimin e kokainës nga Kolumbia.

Gjatë aksionit u sekuestrua një sasi prej 84 kilogramëve kokainë, ndërsa u ndaluan shtatë persona, shumica shtetas shqiptarë. mes tyre spikat një i kërkuar nga Interpol Tirana për vrasje në Shqipëri. Një tjetër i arrestuar konsiderohet si lidhje e drejtpërdrejtë me grupet e narkotrafikut në Kolumbi. Sipas burimeve konfidenciale, njëri prej të ndaluarve është emër i njohur në qarqet e biznesit në Shqipëri.

Hetuesit grekë zbulojën se rrjeti kishte krijuar një kompani fasadë, e themeluar në vitin 2023, e cila deklarohej si importuese trëndafilash nga Kolumbia. Kompania nuk kishte seli reale apo staf të vërtetë. Aktiviteti i saj i deklaruar në Kodin e Procedurës Penale nuk lidhej me tregtinë e luleve.

Shërbimet kompetente të AADE-s, pas ekzaminimit të historikut, zbuluan se gjatë tetë muajve, kompania kishte realizuar shtatë dërgesa trëndafilash nga Kolumbia në Greqi. Hetuesit besojnë se dy dërgesat e para shërbyen si provë, për të testuar metodën e trafikimit pa u zbuluar. Në dërgesat pasuese, substanca narkotike fshihej brenda dërgesave të luleve.

Për të minimizuar rrezikun e zbulimit, rrugët e transportit ishin planifikuar me kujdes. Në vend të importit të drejtpërdrejtë nga Kolumbia, lulet me kokainë dërgoheshin fillimisht në Kanada. Atje, lëshoheshin dokumenta të reja transporti. Dërguesi shfaqej si një kompani kanadeze, ndërsa marrës ishte një luleshitës në zonën e Artemidhës.

Megjithatë, dyshohet se luleshitësja ishte vetëm një fasadë. Hapësira e dyqanit ishte marrë me qira nga anëtarët e rrjetit vetëm pak ditë para mbërritjes së ngarkesës në Athinë.

Ngarkesa e paligjshme ndodhej brenda 80 kutive me lule. Çdo buqetë me 40 trëndafila përmbante afërsisht 11 lule të modifikuara. Metoda ishte e veçantë: majat e luleve natyrore ruheshin, ndërsa kërcejt zëvendësoheshin me tuba plastikë. Brenda këtyre kërcejve plastikë vendosej kokaina. Kjo bënte që edhe një kontroll standard nga doganierët ose policia ta kishte të vështirë të zbulonte drogën.

Një operacion i tillë nuk është i panjohur. Raste të ngjashme janë regjistruar më parë nga rrjetet kolumbiane. Në vitin 2023, drogë u gjet në një dërgesë trëndafilash në aeroportin e Amsterdamit. Një sekuestrim i ngjashëm u bë në vitin 2018 nga autoritetet ruse në Shën Petersburg.

Në aksionin përfundimtar, krahas policisë së rendit, u angazhuan forcat speciale EKAM dhe Drejtoria Kundër Krimit të Organizuar. Dosja penal përfshin nëntë të pandehur, nga të cilët shtatë u arrestuan.

Pjesa më e madhe e ndalimeve u krye në dyqanin e luleve në Loutsa. Personat që konsiderohen si udhëheqës të rrjetit ishin strehuar në një vilë me qira në Marathon. Kontrolli në këtë vilë solli zbulimin e një sasie kokaine dhe mbeturinave të kërcejve plastikë. Kjo i përforcon dyshimet se vendi shërbejte për përpunimin e drogës së importuar më parë.

Për mbrojtjen e katër prej gjashtë të arrestuarve është angazhuar avokati i njohur Sakis Kechagioglou. Në mbrojtje të një tjetri është edhe avokati Manolis Vamvounakis.