U përfol se presidenti amerikan mban paruke, Trump i përgjigjet komenteve: Era do të ma kishte marrë deri tash

Pamja e presidentit amerikan Donald Trump u bë shqetësim në rrjetet sociale pas një paraqitjeje në Las Vegas, ku komentuesit vunë re ndryshime në flokët e tij. Debati u ndez më 5 gusht, kur ai ishte në resortin Red Rock. Shumë pretenduan se flokët e liderit dukeshin të rrallë, madje hodhën dyshime për mundësinë e përdorimit të parukës.

Edhe pse gjatë qëndrimit në Nevada, Trump foli për çështje si mosmarrëveshjet tregtare me Kanadanë dhe planet politike, këto tema u lanë në hije. Vëmendjen e morën komentet për pamjen e tij. Disa përdorues krahasuan pamjet e fundit me ato të mëparshme, duke argumentuar se flokët ishin dukshëm më pak të dendura. Në rrjet u shpërndanë edhe pretendime të hapura për paruke.

Një gazetar shkroi hapur në platformën X: “A mban Trump paruke apo çfarë dreqin po ndodh këtu?”. Reagim pati edhe nga profili zyrtar i Partisë Demokratike, i cili postoi një foto të Trumpit me mbishkrimin: “Kështu dukeshin flokët e Trumpit më pak se tre muaj më parë”.

Vëmendje të shtuar morën edhe disa pamje të 2 gushtit, kur Trump shihej duke hyrë në avionin presidencial Air Force One. Atëherë era ia ekspozoi pjesën e sipërme të kokës, çfarë nxit edhe më shumë komente.

Në një dalje për shtyp në kopshtin e trëndafilave të Shtëpisë së Bardhë, Trump iu përgjigj çështjes. Ai e lidhi ndryshimin e pamjes me motin e keq. E përshkroi atë si “më të keqin që kam përjetuar ndonjëherë, përveç ndoshta një uragani në Florida”.

Për të vërtetuar se nuk mbante paruke, presidenti solli një shembull të kaluar. Kujtoi një tubim në aeroportin e Daytonit më 16 mars 2024.

“Dola në skenë dhe era po frynte jashtëzakonisht fort. Për vite me radhë kam dëgjuar histori se mbaj paruke. Nuk mbaj. Atë mbrëmje të gjithë mund ta shihnin këtë, sepse po të kisha paruke, do të më ishte marrë nga koka”, deklaroi Trump.

Ai shtoi se forca e erës ishte aq e madhe saqë teleprompterët fluturuan nga skena. “Ranë rreth 50 metra më tej, afërsisht në mes të një fushe futbolli. U zhdukën sapo u ngjita në skenë”, rrëfeu ai.

Megjithatë, shpjegimi i tij nuk i ndaloi komentet në platformën X. Përdoruesit vazhduan të publikojnë reagime kryesisht negative. Disa bënë krahasime të ndryshme. Njëri shkroi se Trump “duket si Jabba the Hutt me paruke”. Komentet u fokusuan edhe në detaje të tjera të pamjes së tij, duke e krahasuar me një bretkosë.

Një tjetër postim ishte më direkte: “Po shndërrohet në një derr. Është i shëmtuar nga brenda dhe jashtë”. Një përdorues shkoi edhe më tej: “Tani e kuptoj pse njerëzit besojnë te njerëzit-zvarranikë. Duket si një kostum prej lëkure njeriu”.