U mbyll në tualetin e picerisë dhe telefonoi e tmerruar, arrestohet shqiptari në Itali! Kërcënonte me telefonata dhe mesazhe ish-partneren

Një shtetas shqiptar është arrestuar në Mestre të Venecias, në Itali, nën dyshimin se prej kohësh përndiqte ish-partneren e tij.

Ngjarja ka alarmuar autoritetet lokale.

Sipas raportimeve, gruaja e tmerruar nga prania e tij është mbyllur në tualetin e një picerie. Prej aty ka njoftuar menjëherë policinë.

Mediat italiane bëjnë me dije se efektivët mbërritën me shpejtësi në lokal pas thirrjes për ndihmë. Në vendngjarje ata ndaluan shqiptarin në flagrancë. Akuza ndaj tij është përndjekja.

Verifikimet e para tregojnë se i dyshuari e kishte kërcënuar shpesh ish-partneren përmes telefonatave dhe mesazheve. Ai ishte orvatur disa herë ta takonte në ambientet ku ajo kalonte kohën zakonisht.

Policia vlerëson se kjo sjellje e vazhdueshme i ka shkaktuar viktimës gjendje të rëndë ankthi. Për t'i shpëtuar presionit, ajo kishte ndryshuar edhe rutinën e përditshme.

Situata degradoi kur burri u shfaq papritur në picerinë ku ndodhej gruaja. E frikësuar, ajo u izolua në tualet dhe kërkoi ndërhyrjen e forcave të rendit.

Pas marrjes së dëshmive dhe rindërtimit të ngjarjes, uniformat blu konfirmuan elementët e veprës penale të përndjekjes. Shqiptari u arrestua menjëherë. Autoritetet italiane kanë nisur procedurat ligjore dhe po trajtojnë çështjen sipas legjislacionit në fuqi.