Turkish Airlines porosit deri në 150 Boeing 737 MAX, marrëveshja më e madhe në historinë e kompanisë

Turkish Airlines ka mbyllur porosinë më të madhe të avionëve në historinë e saj. Kompania arriti marrëveshje me Boeing për deri në 150 avionë të familjes 737 MAX.

Negociatat për kontratën kishin nisur në vitin 2025. Tashmë marrëveshja është finalizuar dhe konsiderohet pjesë qendrore e strategjisë afatgjatë të rritjes. Ajo synon të forcojë rrjetin e fluturimeve në distanca të shkurtra dhe të mesme, ndërsa mbështet zgjerimin e mëtejshëm të flotës.

Finalizimi u bë në prani të presidentit turk Recep Tayyip Erdogan.

Sipas kushteve të dakordësuara, porosia e garantuar përfshin 100 avionë Boeing 737-8. Përveç tyre, kompania ka siguruar opsionin për 50 avionë shtesë të së njëjtës familje 737 MAX.

Po ashtu, kontrata i jep të drejtën Turkish Airlines të kalojë në modelin 737-10. Ky është varianti më i madh i serisë 737 MAX.

Fleksibiliteti i parashikuar i lejon transportuesit të përshtasë kapacitetin sipas kërkesës së pasagjerëve dhe nevojave operacionale në rrjetin e tij.

Kryetari i Bordit dhe i Komitetit Ekzekutiv të Turkish Airlines, Murat Seker, e cilësoi marrëveshjen si vendimtare. “Kjo marrëveshje përfaqëson një hap të rëndësishëm në përputhje me strategjinë tonë për zgjerimin e flotës”, tha ai.

Seker shtoi se avionët e rinj do të rrisin performancën operacionale. “Aeroplanët e rinj Boeing 737 MAX do të sjellin më shumë efikasitet dhe fleksibilitet në operacionet tona dhe do të mbështesin rrjetin e gjerë të fluturimeve që shërbejmë nga qendra jonë në Stamboll”, u shpreh ai.