Trump thotë se Irani “praktikisht ka hequr dorë” nga ambiciet për armë bërthamore

Presidenti amerikan Donald Trump ka lënë të kuptohet se Irani “praktikisht ka hequr dorë” nga çdo plan për të zhvilluar armë bërthamore – një nga objektivat e deklaruara më shpesh nga administrata e tij në konfliktin me Teheranin, i cili tashmë ka hyrë në muajin e tij të tetë.

Të shtunën, Trump po ashtu pohoi se çmimet e naftës po bien, pasi kishin qëndruar të larta për një kohë të gjatë pas sulmeve të ndërmarra nga Izraeli dhe SHBA-ja kundër Iranit më 28 shkurt.

“Çmimi i naftës po bie. Aktualisht nafta është më lirë; madje çmimi është më i ulët se sa ishte gjatë administratës së (Joe) Bidenit – e cila nuk bëri asgjë lidhur me faktin se Irani nuk duhet të ketë armë bërthamore”, u tha Trump gazetarëve ndërsa largohej nga Shtëpia e Bardhë për të marrë pjesë në një tubim në shtetin amerikan të Ohajos.

“Për më tepër, siç e dini, Irani praktikisht ka hequr dorë nga çdo plan për armë bërthamore”, shtoi ai.

Prej kohësh, Irani i ka mohuar akuzat e SHBA-së dhe Izraelit se synon të zhvillojë armë bërthamore; një qëndrim që u përsërit edhe nga presidenti Masoud Pezeshkian gjatë vizitës së tij muajin e kaluar në Nju Jork, me rastin e Asamblesë së Përgjithshme të OKB-së.

Pezeshkian deklaroi se Teherani nuk kërkon armë bërthamore për shkak të një ndalese fetare dhe ofroi të reduktonte rezervat e tij të uraniumit të pasuruar nën mbikëqyrjen ndërkombëtare.

Megjithatë, Irani ka këmbëngulur se nuk do të bëjë kompromise lidhur me programin e tij civil dhe paqësor bërthamor, e as nuk do të bëjë lëshime strukturore, për sa kohë që SHBA-ja nuk i heq sanksionet ekonomike.

Sulme të reja ushtarake?

Të shtunën, Trump udhëtoi drejt Ohajos, ku Partia e tij Republikane po zhvillon një garë të ngushtë për një vend në Senatin amerikan, ndërsa përpiqet të ruajë shumicën e saj të brishtë në Kongres.

Disa senatorë republikanë në detyrë në mbarë SHBA-në po përballen me sfida të vështira politike, pasi mbështetja për luftën me Iranin po bie ndërkohë që çmimet e larta të karburantit dhe produkteve të tjera bazë vazhdojnë të jenë shqetësuese.

Ditët e fundit, raportohet se ushtria amerikane ka dislokuar dy bateri shtesë raketash “Patriot” për të mbrojtur objektet energjetike në Arabinë Saudite dhe Katar, në kuadër të përgatitjeve për sulme të mundshme të reja ushtarake ndaj Iranit.

Sipas raportit, një bateri u dërgua në Arabinë Saudite muajin e kaluar për të mbrojtur një objekt kyç të naftës, ndërsa një tjetër u dislokua në Katar për të mbrojtur një objekt të gazit natyror.

Vendosja e forcave kishte për qëllim t’u jepte garanci të dyja vendeve se Uashingtoni do të mbronte infrastrukturën e tyre kritike të energjisë, nëse SHBA-ja rifillonte sulmet e mëdha luftarake ndaj Iranit. /ABC24.AL/