Trump reagon me një “OK” pasi i thanë se Zelenskyy e quajti të dobët

Me një fjalë të vetme u përgjigj presidenti amerikan Donald Trump pasi u njoh me komentin e presidentit ukrainas Volodymyr Zelenskyy. Ai e kishte cilësuar shefin e Shtëpisë së Bardhë si të dobët për shkak të marrëveshjes për importin e karburantit dizel nga Rusia.

Episodi ndodhi gjatë një bashkëbisedimi me gazetarët në Uashington.

“Kush e tha këtë?” pyeti Trump sapo u informua për deklaratën. Pasi gazetari sqaroi se bëhej fjalë për Zelenskyy-n, presidenti amerikan u mjaftua me një “OK” lakonik dhe ia kaloi menjëherë fjalën një gazetari tjetër, raporton ABC24.AL.

Të premten, më 9 tetor, Trump kishte njoftuar se zhvilloi një bisedë telefonike me presidentin rus Vladimir Putin. Sipas tij, në atë bisedë palët ranë dakord që Moska të furnizojë Shtetet e Bashkuara me miliona tonë karburant dizel.

Ky njoftim shkaktoi reagim të ashpër në Kiev. Zelenskyy e cilësoi lehtësimin e sanksioneve ndaj Rusisë si një vendim “absolutisht të tmerrshëm”. Sipas tij, lëvizja përbën një dhuratë për ditëlindjen e Putinit dhe do t'i sigurojë liderit të Kremlinit miliarda dollarë shtesë për të vazhduar luftën.

Presidenti ukrainas shtoi se situata e krijuar dëshmon dobësi nga ana e Shteteve të Bashkuara.

Pas kontaktit me Trumpin, vetë Putini konfirmoi se Rusia është e gatshme të furnizojë me produkte nafte jo vetëm SHBA-në, por edhe tregjet globale. Ai shprehu gjithashtu shpresën se bashkëpunimi mes dy vendeve do të vijojë. /ABC24.AL/