Trump: Evropa ka rënë dakord të lirojë rezerva të mëdha nafte

Presidenti amerikan Donald Trump deklaroi se Evropa ka pranuar të vërë në dispozicion pa vonesë një pjesë të rezervave të saj energjetike.

Sipas tij, vendimi vjen në një moment presioni politik. Ai dhe republikanët po kërkojnë zgjidhje për shtrenjtimin e karburanteve para zgjedhjeve për Kongresin në nëntor në SHBA.

Lajmi u bë publik nga vetë kreu i Shtëpisë së Bardhë në rrjetet sociale.

Trump nuk dha detaje. Nuk u bë e ditur cilat shtete evropiane do të marrin pjesë dhe as sasia konkrete që do të lirohet.

Në postimin e tij ai u shpreh: “Evropa sapo ka rënë dakord të lirojë një sasi të madhe të rezervave të saj të mëdha të karburantit dizel. Procesi do të fillojë menjëherë”.

Rritja e çmimeve të karburantit është ndjerë fort. Si në Shtetet e Bashkuara, ashtu edhe në tregjet ndërkombëtare, kostot janë rritur ndjeshëm gjatë tetë muajve të konfliktit me Iranin.

Trump ka përsëritur qëndrimin se ky çmim ia vlen. E quan të domosdoshëm për të penguar Teheranin të sigurojë armë bërthamore.

Ai shprehet optimist se çmimet do të ulen me mbylljen e luftës.

Por përfundimi i konfliktit ende nuk duket afër.