Tre të arrestuar në Lezhë, dyshohet se po përgatisnin atentat! Njëri lidhet me vrasjen e ndodhur në Sarandë! Gjenden pistoleta, skafandra… (PAMJET)

Policia e Lezhës ka arrestuar tre persona në kuadër të një operacioni të koduar “Detajet”.

Ndërhyrja u finalizua së fundmi dhe synonte parandalimin e një krimi të rëndë.

Sipas autoriteteve, të dyshuarit po përgatisnin një atentat. Ata dyshohet se do të kryenin një vrasje. Për disa ditë radhazi efektivët i kanë mbajtur nën vëzhgim.

Kapja e tyre u bë në Shkodër. Operacioni u drejtua nga strukturat e Lezhës. Gjatë aksionit u gjetën dhe u sekuestruan armë dhe veshje që dyshohet se do të shërbenin për ekzekutimin e planit.

Sipas policisë, skema ishte e ndarë në role. Dy prej të dyshuarve lëviznin të armatosur dhe me skafandra, me një motomjet në rrugën e vjetër Pllanë-Lezhë. I treti priste me automjet për t’i larguar nga vendi pas krimit.

Të arrestuarit janë E. T., 25 vjeç, banues në Barbullush, K. Y. (Sh.), 34 vjeç, banues në Kamzë dhe V. P., 38 vjeç, banues në Kurbin.

“Operacioni u zhvillua pasi policia mori informacion për lëvizje të dyshimta të dy personave me skafandra në rrugën e vjetër Pllanë-Lezhë. Pas kontrolleve në zonë, shërbimet e policisë ndaluan në aksin Gjadër–Barbullush një automjet tip “Volkswagen”, në të cilin udhëtonin tre të dyshuarit”, tha policia.

Gjatë kontrollit në mjet dhe në zonë u sekuestruan tre pistoleta me krehra e fishekë. U bllokua edhe motomjeti që dyshohet se do të përdorej për atentatin. Pamjet, siç shihet edhe në video, tregojnë sendet e sekuestruara.

Verifikimet treguan se motomjeti rezulton i vjedhur në Suedi. Ndërkohë materialet procedurale i janë përcjellë Prokurorisë për veprime të mëtejshme.

Blutë dyshojnë fort se bëhet fjalë për të njëjtët autorë të atentatit të ndodhur në Sarandë. Njëri prej të arrestuarve lidhet pikërisht me atë ngjarje. Aktualisht po zhvillohen kontrolle në disa qytete, përfshirë Shkodrën, Laçin dhe Kamzën.