Transportonte emigrantë të paligjshëm në Greqi, në pranga 42-vjeçari. I sekuestrohen 6800 euro

Drejtoria Vendore e Policisë Berat ka përmbyllur operacionin e koduar "Kthesa" për goditjen e kalimit të paligjshëm kufitar drejt Greqisë.

Në pranga ra shtetasi A. H., 42 vjeç, banues në Berat. Ai u kap në flagrancë.

Ndërkohë u procedua në gjendje të lirë shtetasi D. Rr., po 42 vjeç, me banim në Laç. Ky i fundit dyshohet se ishte pasagjer në automjetin e të arrestuarit për të kaluar ilegalisht kufirin.

Mjeti me të cilin lëviznin të dy u ndalua në afërsi të PKK Kakavijë. Sipas policisë, 42-vjeçari nga Berati po transportonte bashkëmoshatarin nga Laçi me destinacion Greqinë, në mënyrë të kundërligjshme.

Gjatë ndërhyrjes u sekuestruan 6800 euro. Shuma dyshohet se është përfituar nga aktiviteti i paligjshëm i transportit. Po ashtu u bllokuan tre aparate celularë dhe automjeti që përdorej për lëvizje.

Hetimi ka zgjatur rreth një muaj. Ai u zhvillua me metoda proaktive nën drejtimin e Prokurorisë. Në operacion u angazhuan specialistët e Seksionit për Hetimin e Narkotikëve në bashkëpunim me Forcën e Posaçme Operacionale.

Materialet procedurale për rastin i janë referuar Prokurorisë për veprime të mëtejshme.