Trajneri i kombëtares Maran nis takimet me klubet shqiptare, fokusi te bashkëpunimi dhe njohja me futbollin vendas

Trajneri i përfaqësueses kuqezi, Rolando Maran, ka hedhur hapat e parë në një iniciativë të re, duke nisur një seri vizitash pranë klubeve të Abissnet Superiore. Qëllimi i këtij turi është të vendosë një bashkëpunim më të ngushtë me skuadrat vendase dhe të jetë më i pranishëm në realitetin e futbollit shqiptar.

I shoqëruar nga bashkëpunëtorët e tij, Christian Maraner dhe Ervin Bulku, Maran u ndal fillimisht te KF Tirana. Atje, ai u prit nga trajneri i bardhebluve, Dean Klafuriç, dhe pati mundësinë të ndiqte nga afër një stërvitje të ekipit kryeqytetas.

Biseda mes palëve u përqendrua te shkëmbimi i përvojave dhe ideve lidhur me punën e përditshme, rritjen e lojtarëve dhe gjendjen aktuale të futbollit në vend.

Këto vizita përbëjnë një strategji të re të trajnerit italian, i cili kërkon të krijojë një linjë komunikimi të drejtpërdrejtë me stafet teknike të klubeve dhe të kuptojë më mirë dinamikën e kampionatit shqiptar. Një tjetër synim i kësaj qasjeje është që stafi i kombëtares të ketë një pasqyrë më të qartë të lojtarëve dhe talenteve që dalin nga skuadrat vendase.

Në javët e fundit, Maran ka ndjekur me vëmendje edhe paraqitjet e Egnatias dhe Dinamo City në garat europiane, duke mbajtur nën monitorim ecurinë e këtyre ekipeve dhe të futbollistëve shqiptarë në arenën ndërkombëtare.

Turneu i trajnerit të kombëtares do të vazhdojë edhe me pjesën tjetër të klubeve të Abissnet Superiore. Takime të tjera janë planifikuar me trajnerë, stafe teknike, drejtues dhe lojtarë të skuadrave të ndryshme.

Nëpërmjet këtij kontakti të ngushtë, synohet të forcohet lidhja mes përfaqësueses dhe klubeve, duke krijuar një urë bashkëpunimi në funksion të zhvillimit të futbollit shqiptar dhe të ekipit kombëtar.