Tragjedi në Itali: Bie nga skela, humb jetën shqiptari në Rimini. Prokuroria nis hetimet

Një tragjedi ka prekur rëndë komunitetin shqiptar në Itali. 59-vjeçari Saim Myrtaj humbi jetën në Rimini, pasi ra nga skela e një kantieri ndërtimi. Ngjarja ndodhi në Rivabella, rreth orës 13:30 të ditës së hënë. Për rastin, Prokuroria vendase ka nisur hetim për vrasje nga pakujdesia.

Sipas të dhënave paraprake, viktima ndodhej e vetme në katin e dytë të skelës. Struktura ishte montuar përgjatë fasadës së një pallati dykatësh, ku po kryheshin punime mirëmbajtjeje. Dyshohet se Myrtaj ka rënë nga një hapje e platformës. Ajo hapësirë shërbente për kalimin e shkallës mes niveleve. Pas rënies nga disa metra lartësi, ai përfundoi në tarracën e një apartamenti në katin e parë.

Goditjen e dëgjoi një banor i zonës. Ishte ai që dha alarmin. Në vend mbërritën menjëherë ekipet mjekësore dhe autoritetet. Mjekët konstatuan vdekjen në vendngjarje.

Hetimet vijojnë për të zbardhur shkaqet.

Skela është vendosur nën sekuestro nga autoritetet italiane. Po verifikohen elementët mbrojtës dhe mënyra e kalimit mes kateve. Në fokus është edhe respektimi i rregullave për sigurinë në punë. Hetuesit po shqyrtojnë disa pista. Nuk përjashtohet humbja aksidentale e ekuilibrit. Po ashtu, po vlerësohet nëse viktima pësoi ndonjë problem shëndetësor. Një tjetër drejtim është verifikimi për shkelje të mundshme të kushteve të sigurisë në kantier. Për përcaktimin e saktë të shkakut të vdekjes pritet ekspertiza mjeko-ligjore. Autopsia do të ketë rol vendimtar.

Në kuadër të procedurës është marrë në pyetje punëdhënësi i Myrtajt. Ai është pronar i një firme ndërtimi në zonë.

Viktima ishte vendosur në Rimini që në fillim të viteve 2000. Prej vitesh punonte si murator dhe artizan i pavarur. Ai la pas bashkëshorten dhe dy fëmijë. Ngushëllime për familjen ka shprehur publikisht shoqata e shqiptarëve "Agimi Rimini".