Tirana në ngërçin e Veliajt, Kume: Ligji u shkel nga palët, shkarkimi tani nuk do ta zgjidhte krizën e kryeqytetit!

Tirana gjendet në një bllokadë politike për shkak të shkeljeve ligjore të kryera nga të gjitha palët. Kjo është analiza e ish-kryetarit të Komisionit Qendror të Zgjedhjeve, Kristaq Kume, për situatën që ka krijuar rasti i kryebashkiakut Erion Veliaj.

Sipas ekspertit, ngjarjet janë zhvilluar sipas interesave të momentit. “Është një rast shumë i qartë për mosrespektimin e parimeve të shtetit ligjor. Ligji përcakton se çfarë duhet bërë në një situatë të tillë, por ai nuk u zbatua. U bë sikur u zbatua, si nga opozita ashtu edhe nga mazhoranca. Kjo u bë vetëm sa ishte politikisht e leverdishme, dhe jo me qëllimin për të përmirësuar gjendjen e qeverisjes së kryeqytetit. Normaliteti vjen vetëm kur udëheq ai që ka mandate nga populli”, u shpreh Kume në një intervistë për “Top Channel”.

Kume hodhi poshtë pretendimet se Gjykata Kushtetuese e riktheu në detyrë kryebashkiakun. Ai argumentoi se vendimi i kësaj gjykate anuloi vetëm mënyrën e paligjshme të shkarkimit. Ky shkarkim u krye pa dëgjuar Veliajn në mbledhje dhe pa u bazuar në nenin 115 të Kushtetutës nga ana e Këshillit të Ministrave.

“Ligji për vetëqeverisjen vendore parashikon ndërprerjen e mandatit nëse zyrtari mungon në punë për 3 muaj. Kjo pikë nuk u shqyrtua nga Gjykata, as nuk u hodhi poshtë. Mungesa tre mujore është shkelje e rëndë e ligjit. Prandaj, procedura e ndërmarrë nga Këshilli Bashkiak dhe Këshilli i Ministrave duhej të ishte bërë sërish, sipas rregullave”, shpjegoi eksperti.

Aktualisht Bashkia e Tiranës funksionon pa kompetencat e deleguara tek nënkryetarja Anuela Ristani pasi vetë Veliaj i shfuqizoi ato. Në këtë kontekst, një shkarkim i ri do të ishte pa efekt praktik sepse bllokadën nuk do ta zgjidhte.

“Të supozojmë se sot mblidhet Këshilli Bashkiak, dëgjon Veliajn dhe më pas voton shkarkimin e tij. Kjo duhet të shkojë tek Këshilli i Ministrave, i cili ka afatin e tij për vendimmarrje. Më pas do të duhej edhe një vendim i Gjykata Kushtetuese. I gjithë ky proces kërkon shumë kohë. Veliaj mund të mos jetë më në detyrë, por askush tjetër nuk mund të zgjedhet në vendin e tij. Afati gjashtëmujor para zgjedhjeve të ardhshme nuk lejon një proces zgjedhor të ri”, tha Kume.

Për Kumin, zgjidhja e vetme vjen nga Gjykata e Lartë. Ajo duhet të vendosë, në rast se masës ndaj Veliajt i lehtësohet nga arresti shtëpiak, se cila institucion do të merret me udhëheqjen e përkohshme të Bashkisë së Tiranës deri në mbajtjen e zgjedhjeve të reja lokale.