‘Territorialja’, Spiropali paralajmëron votën kundër: Nuk është kjo reforma që duhet, s’jemi kartonë këtu

Deputetja socialiste Elisa Spiropali paralajmëroi votën kundër reformës territoriale gjatë seancës së sotme në Kuvend. Ajo mori fjalën para votimit të pritshëm dhe ngriti kritika për mënyrën si funksionojnë institucionet, për decentralizimin dhe për sistemin zgjedhor.

Spiropali e nisi fjalimin me tone kritike për klimën politike në vend. Tha se në Parlament vazhdon të bëhet teatër, ndërsa jashtë tij qytetarët protestojnë. Sipas saj, mungon kohezioni dhe besimi te institucionet, te partitë politike, te deputetët, te kontrata sociale dhe te shtyllat e shtetit.

“Kemi zhdukur së bashku çdo hapësirë normale komunikimi, besimi, mënyrë të ekzekutimit dhe të administrimit të pushtetit dhe politikës”, u shpreh ajo. Theksoi se secili duhet ta nisë reflektimin nga vetja.

Për reformën e propozuar, Spiropali u shpreh se nuk bëhet fjalë për një reformë të vërtetë.

“Unë besoj se sot, Reforma Territoriale, nuk është një reformë. Duhet ta themi këtu hapur”, deklaroi deputetja. Sipas saj, thelbi nuk është numri i bashkive, por pushteti që ato duhet të kenë. E quajti të lehtë ndryshimin e hartës, por më të vështirë konceptimin e pushtetit. Pyeti nëse qytetarët ndihen sot më pranë vendimmarrjes.

Ajo lidhi çështjen territoriale me decentralizimin dhe autonominë institucionale. Nëse u kërkohet më shumë përgjegjësi bashkive, argumentoi ajo, atëherë duhet diskutuar edhe autonomia e institucioneve në çdo nivel. Nuk mund të flitet për shpërndarje të pushtetit në territor, pa u ndalur te përqendrimi i tij.

Më tej, Spiropali foli për rolin e kryetarëve të bashkive. Tha se ata nuk mund të trajtohen si prefektë apo si hallka të partisë në pushtet. Edhe pse pjesë e shumicës, kërkoi që atyre t’u njihet kompetenca dhe pesha përfaqësuese. Sipas saj, ata përfaqësojnë të gjithë qytetarët dhe nuk mund të thirren në takime si vartës.

Deputetja reagoi edhe ndaj retorikës së disa kolegëve për fitore totale në zgjedhjet vendore.

“Më vjen shumë keq kur dëgjoj nga kolegë të mi që flasin pa vend sot për të folur me tone të tilla. Ne do i mundnim të gjithë, do i fitojmë të gjitha bashkitë… Jo mo, jo. Nuk është normale që t’i fitosh të gjitha bashkitë”, tha ajo. Shtoi se institucionet duhet të jenë më të forta se individët që i drejtojnë.

Një tjetër pikë e fjalës së saj ishte sistemi zgjedhor. Spiropali tha se nuk duhet reformuar vetëm pushteti vendor, por edhe mënyra e votimit. Kritikoi modelin aktual me lista treçerek të mbyllura dhe një çerek të hapura. Qytetari, theksoi ajo, duhet ta dijë qartë se për kë voton.

“Ne s’jemi as kartona, as njerëz pa përgjegjësi. Mënyra se si ju na drejtoheni është revoltuese. Revolta jonë duhet të jetë edhe e brendshme”, u shpreh deputetja.

Ajo akuzoi se disa deputetë sillen si përfaqësues formalë, ndërsa në fakt zbatojnë urdhrat e kryetarit. “Ju bëni sikur jeni përfaqësues të qytetarëve. Ju thotë kryetari çfarë duhet të bëni dhe ju e bëni. Pavarësia e madhe ju”, tha Spiropali.

Sipas saj, reforma nuk duhet pritur vetëm nga kundërshtari politik. Duhet kërkuar edhe brenda shumicës. Theksoi nevojën për të merituar fitoren, për të reformuar partitë dhe bashkitë, si dhe për të zgjedhur njerëzit më të mirë përmes proceseve të brendshme.

Në mbyllje, Spiropali sqaroi se qëndrimi i saj nuk ishte personal.

“Qëndrimi im nuk ka qenë personal. Në këtë pikë keni shumë për të bërë”, përfundoi ajo.