“Territorialja”, Hila: Duhet të zvogëloheshin akoma, disa bashki japin vetëm rroga, as rrugë nuk shtrojnë dot

Hila kërkon më pak bashki: Disa nuk shtrojnë dot as një rrugë, vetëm rroga japin

Analisti Dritan Hila mbron një tkurrje edhe më të fortë të hartës vendore. I ftuar këtë të enjte në emisionin “Të Paekspozuarit” të Ylli Rakipit në Vizion Plus, ai tha se numri aktual i bashkive mbetet i lartë.

Sipas tij, disa njësi kanë funksionuar vetëm si zyra punësimi. As një rrugë nuk shtronin dot pa mbështetjen e qeverisë qendrore. Debati u ndez në studio.

“Pse është bërë kjo reformë? Duke parë këtë listën e tyre, unë kam parë që këta janë jorentabël. Se ku e ka rentabilitetin Prrenjasi, Selenica, që marrin fonde nga qeveria”, u shpreh Hila. Sipas tij, zgjidhja më e mirë do të ishte pakësimi i mëtejshëm. Kjo, argumentoi ai, i jep më shumë peshë edhe zërit të kryetarit të bashkisë. Si shembull solli avarinë e ujësjellësit në Vlorë, që varej nga rrjeti i Fierit.

Replika ishte e menjëhershme. “Ujësjellësi nuk është i bashkive”, ndërhyri Bushati.

Hila insistoi për konsolidim më të thellë dhe zgjerim kompetencash. “Duhen konsoliduar akoma më tepër, dhe t’u jepen kompetenca. Hiq bashkitë politike, Konispol, Dropull, unë edhe Himarën e kisha futur në Vlorë, me thënë të drejtën”, tha ai. Sipas analistit, pa këtë ndërhyrje nuk ka efekt real. “Përndryshe, a ishin 45 a 61, nuk do ketë ndryshim”, shtoi ai.

Në fund, ai vlerësoi se njësitë e shkrira më parë nuk prodhonin shërbim. “Di të them që këto që janë shkrirë ishin vetëm qendra punësimi, jepnin vetëm rrogën, nuk ishin në gjendje të shtronin një rrugë”, deklaroi Hila. Ndërsa për një rast konkret u shpreh: “Se pse duhet të ishte bashki Këlcyra, se kuptoj, fshat ishte, fshat mbeti”.