Tentuan të trafikonin 91 kg kanabis drejt Greqisë, arrestohet çifti në Kakavijë

Tentativa për të trafikuar drejt Greqisë rreth 91 kilogramë drogë u ndalua në Kakavijë.

Goditja u arrit në pikën e kalimit kufitar, ku efektivët parandaluan kalimin e lëndës narkotike jashtë territorit shqiptar.

Sipas të dhënave, për kontroll u ndal një furgon që po dilte nga Shqipëria. Brenda tij u zbuluan rreth 88 pako me lëndë të dyshuar kanabis. Droga ishte fshehur me kujdes. Pakot gjendeshin në hapësira të krijuara enkas në dyshemenë e mjetit, nën shtresën e saj. Sasia e kapur shkonte në rreth 91 kilogramë.

Në flagrancë u arrestuan dy persona. Ata janë një çift nga Tirana, bashkëshortë me njëri-tjetrin. Bëhet fjalë për drejtuesin e furgonit K. A., 28 vjeç, dhe pasagjeren B. A., 25 vjeçe.

Rreth 91 kilogramë lëndë e dyshuar narkotike dhe furgoni u sekuestruan në cilësinë e provës materiale. Ndërkohë materialet procedurale do t’i përcillen Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër. Hetimi është për veprën penale “Trafikimi i lëndëve narkotike”.