Të tjera detaje nga vrasja e shqiptarit në Itali, zbulohet emri dhe foto

Hetimet për gjetjen e trupit në një pus në Longiano, Itali, kanë konfirmuar zyrtarisht identitetin e viktimës. Është për 31-vjeçarin shqiptar Denaldo Maxhallaku. Ai ishte zhdukur pa gjurmë që nga mbrëmja e 7 tetorit.

Përfundimet e para mjeko-ligjore dhe gëzhojat e pistoletës pranë skenës drejtojnë prokurorinë e Forlit drejt vrasjes me armë zjarri. Sipas ekspertizës, vdekja ka ndodhur atë natë. 31-vjeçari kishte dalë nga shtëpia për të takuar një person të njohur në Savignano sul Rubicone. Ishte baba i një vajze njëvjeçare.

Dyshimet për krim të organizuar u përforcuan ditën pas ngjarjes. Automjeti i tij, një Fiat Punto, u gjet i djegur plotësisht pranë lumit Rubicone. Vlerësohet si përpjekje për të shkatërruar prova. Karabinierët rindërtojnë lëvizjet e fundit të viktimës. Kërkojnë të identifikojnë personin e takimit fatal.