“Të palëkundur për të punuar me partnerët”- Hoxha nënshkruan Konventën e OKB kundër Krimit Kibernetik: Siguria, pjesë e agjendës kombëtare të Shqipërisë

Gjatë punimeve të Javës së Nivelit të Lartë të Asamblesë së Përgjithshme të OKB-së, ministri për Evropën dhe Punët e Jashtme, Ferit Hoxha, nënshkroi në emër të Shqipërisë Konventën e Kombeve të Bashkuara kundër Krimit Kibernetik.

Njoftimi u dha nga vetë kreu i diplomacisë shqiptare. Ai e bëri publik nënshkrimin përmes një deklarate zyrtare.

Me këtë hap, Shqipëria rikonfirmon angazhimin për një bashkëpunim ndërkombëtar më të fortë ndaj një kërcënimi që po godet gjithnjë e më shumë qytetarët, bizneset dhe institucionet publike.

Konventa krijon një kornizë të rëndësishme për zgjerimin e bashkëpunimit mes shteteve. Ajo lehtëson shkëmbimin e provave elektronike. Njëkohësisht forcon përpjekjet e përbashkëta për të parandaluar, hetuar dhe ndjekur penalisht krimet e rënda që kryhen në hapësirën digjitale.

Për Shqipërinë, ndërtimi i sigurisë, qëndrueshmërisë dhe besimit në fushën e teknologjisë përbën pjesë thelbësore të agjendës më të gjerë të transformimit digjital. Kështu u shpreh ministri Hoxha.

“Ndërsa teknologjia vazhdon të krijojë mundësi të reja për rritje dhe inovacion, ne duhet të sigurohemi që aftësia jonë për të mbrojtur ata që mbështeten në potencialin e saj, të mund të rritet paralelisht me këto zhvillime”, tha Hoxha.

“Shqipëria mbetet e përkushtuar për të punuar ngushtë me partnerët e saj ndërkombëtarë për të çuar përpara këto parime dhe për të kontribuar në një mjedis digjital më të sigurt, më të mbrojtur dhe më të besueshëm për të gjithë”, shtoi ministri i Jashtëm.