Të paktën 20 të vdekur pas një zjarri në një anije mallrash në Kinë – reagojnë presidenti dhe kryeministri

Të paktën 20 njerëz humbën jetën kur zjarri shpërtheu në anijen e mallrave me flamur të huaj në një port kinez. Ngjarja tronditëse ndodhi gjatë operacioneve të mirëmbajtjes në kantierin detar të Qingdaos, në lindje të vendit.

Sipas të dhënave nga transmetuesi shtetëror CCTV, nga 42 personat që ndodheshin në bordin e anijes, 12 arritën të evakuohen. Pesë të lënduarit aktualisht ndodhen në spital dhe gjendja e tyre cilësohet si e qëndrueshme.

Mediat shtetërore bënë të ditur se zjarri shpërtheu në orën 11:15, sipas kohës lokale. Si pasojë e flakëve, ekziston frika për një numër të konsiderueshëm viktimash. Anija ishte ankoruar në portin e Qingdaos në momentin e incidentit.

Presidenti kinez Xi Jinping bëri thirrje menjëherë për përpjekje të përqendruara kërkim-shpëtimi. Ai kërkoi gjithashtu që hetimi për shkaqet e zjarrit të nisë pa vonesa.

Kryeministri Li Qiang shprehu gjithashtu shqetësimin e tij. Ai u bëri thirrje autoriteteve që të shpëtojnë çdo person të mbetur ende brenda. Ndërkohë, Li Qiang theksoi nevojën e menjëhershme për të marrë masa që parandalojnë çdo rrezik tjetër që mund të shkaktohet nga kjo fatkeqësi. /ABC24.AL/