“Të ishte parandaluar”- Ish-presidenti Meta akuza GJKKO-së dhe Dhomës së Avokatisë: Konflikt i stisur dhe arbitraritet që i shërben vetëm lojërave politike

Ish-presidenti Meta: Konflikti mes GJKKO-së dhe Dhomës së Avokatisë duhej parandaluar, i shërben vetëm lojërave politike

Nga paraburgimi, ish-presidenti Ilir Meta ka reaguar mbi përplasjen që ka lindur mes GJKKO-së së Shkallës së Parë dhe Dhomës Kombëtare të Avokatisë. Ai e përshkruan ngërçin si të stisur dhe arbitrar, me pasoja direkte në kalendarin e gjykimeve.

Vetëm pranë kësaj gjykate, dhjetëra seanca janë anuluar ose shtyrë për shkak të mosmarrëveshjes. Shqetësimi u bë publik në rrjetet sociale. Aty Meta ngre alarmin për zvarritjen e proceseve dhe efektet mbi të drejtën e mbrojtjes. Sipas tij, është cënuar edhe besimi i qytetarëve te drejtësia.

Në reagimin e tij, ish-presidenti thekson se situata ishte paralajmëruar prej kohësh. Por ndërhyrja ka munguar.

Meta shprehet si më poshtë:

“Konflikti absurd midis GJKKO Shkallë e Parë dhe Dhomës Kombëtare të Avokatisë ka sjellë anulimin dhe shtyrjen e gjykimit për dhjetëra çështje vetëm pranë GJKKO të Shkallës së Parë.

Kjo situatë absurde e paralajmëruar që në fund të korrikut duhej të ishte parandaluar me kohë si përmes dialogut, por edhe ndërhyrjes së Këshillit të Lartë Gjyqësor, Kuvendit të Shqipërisë dhe aktorëve të tjerë.

Përveç humbjeve të konsiderueshme financiare të shtetit dhe palëve të interesuara, ka sjellë edhe zvarritjen e proceseve gjyqësore, që është element i gjykimit të drejtë dhe të rregullt.

Vendosja e avokatëve në një presion të dyfishtë si nga GJKKO Shkallë e Parë edhe Dhoma Kombëtare e Avokatisë, cenon jo vetëm të drejtat e tyre, por drejtpërdrejt të drejtat thelbësore të qytetarëve të përfshirë në proceset penale.

Roli i avokatëve në funksion të procesit të rregullt ligjor është i pazëvendësueshëm.

Edhe në diktaturë ka pasur gjyqtarë dhe prokurorë, por demokracia dhe shteti i së drejtës, dallon ndër të tjera nga diktatura se siguron të drejtën e mbrojtjes me avokat.

Ky konflikt i stisur dhe arbitraritet i shërben vetëm lojërave politike dhe minon besimin publik te drejtësia dhe sistemi gjyqësor”.

Sipas Metës, presioni i dyfishtë mbi avokatët cenon rëndë procesin e rregullt ligjor. Ai e konsideron rolin e mbrojtjes të pazëvendësueshëm në një shtet demokratik. Në fund, ish-presidenti vlerëson se ky ngërç nuk i shërben drejtësisë, por vetëm llogarive politike.