Të gjithë të kënaqur me protestën!

**Të gjithë fituan, përveç qytetarit**

Nga Ardit Rada

Në autobusin urban që më çonte drejt qendrës, në stacionin e Porcelanit hipën pesë fëmijë, asnjëri mbi 12 vjeç. Kapuçët e xhupave i kishin ngritur mbi kokë që në çastin e daljes nga shtëpia. Një pjesë e tyre e kishte nga adrenalina e betejës që i priste përpara Ministrisë së Arsimit. Të tjerë po përfitonin nga mungesa e çdo policie operative.

Për një çast mendova sa e lehtë do të ishte për Policinë t'i ndalte këta fëmijë një orë para protestës, pikërisht te autobusët që i çojnë në qendër. Askush nuk do të merrte në dorë gurin dhe molotovin e parë. Por kjo është temë më vete dhe nuk e shtjelloj këtu.

Fakti është se revolta i gjeti të kënaqur pothuajse të gjithë. Politikën, dhe aktorët e rinj që hynë në valle: pedagogët.

Protesta e Flamingove dhe ajo e tetorit kishin në dorë t'i bënin një nder të vërtetë këtij vendi. Të kërkonin atë që politika nuk guxon ta bëjë, ose më saktë nuk dëshiron ta prekë, sepse i prish status quo-në e vet. Energjia u shpërdorua e tëra duke kërkuar qeveri e parlament me letra me vrimë. Më pas protestuesit mblodhën një Kuvend të tyre, që nuk u mblodh më kurrë. Pastaj u përqendruan te Kuvendi me vezë në duar, duke sulmuar deputetët sipas parimit "ca të nënës e ca të njerkes". Sot protesta është më e kompromentuar se kurrë: vezët dhe molotovët kanë kursyer vetëm deputetët e PD