“Tani çdo kriminel do të lirohet, se s’ka avokat”- Kryemadhi flet pas shtyrjes së seancës ndaj saj dhe Metës: U shpërdorua e drejta jonë për t’u mbrojtur

Seanca për Metën dhe Kryemadhin shtyhet, reagon kjo e fundit: Na u mohua e drejta për t'u mbrojtur

Gjyqi ndaj Ilir Metës dhe Monika Kryemadhit u shty ditën e sotme. Arsyeja ishte mungesa e avokatëve të ish-kreut të shtetit, të cilët po respektojnë bojkotin e shpallur nga Dhoma Kombëtare e Avokatisë.

Menjëherë pas vendimit, Kryemadhi doli para mediave jashtë ambienteve të SPAK-ut. Ajo u shfaq e revoltuar. Tha se ishte e përgatitur të paraqiste mbrojtjen e saj. Sipas saj, bojkoti i avokatëve nuk mund të kthehet në penalizim për Metën. Theksoi se institucionet e drejtësisë u kanë cënuar të drejtën për t'u mbrojtur.

“Në rastin konkret qoftë nga unë qoftë nga Meta është shpërdoruar e drejta jonë nga institucionet e drejtësisë për tu mbrojtur. Përdorimi i shtyrjes iu bë për të pezulluar masat e zotit Meta për dy javë”, tha Kryemadhi.

Sipas saj, ajo që po ndodh me bojkotin shkon përtej një proteste të avokatisë. E konsideron pjesë të një skenari më të gjerë. Qëllimi, sipas saj, është frenimi i arrestimeve të tjera që priten.

“Çdo kriminal, çdo njeri që do arrestohet, pas 72 orësh do të dalë se s’ka avokatë, s’ka proces. Ky është skenar që mos të arrestohen njerëz të njerëzve të grupit të strukturuar të Sulltanit të madh. Këta të tjerët që na prishnin punë dhe na destabilizonin situatën politike, t’i mbajmë brenda. Unë e ndjeva e fyer. Avokatja ime ishte në sallë. Jemi në fazën e parashtrimeve ku unë shpjegoj. Pretendimet janë absurde.

S’mund të penalizosh Ilir Metën për bojkotin e avokatëve, nëse vendimi është i ligjshëm apo jo. I njëjti pretendim u ngrit dhe nga avokatja ime. Kërkova që të shtyhej një javë tjetër seanca, për një arsye timen shëndetësore. Unë u ndjeva kriminalisht e shfrytëzuar, pasi njerzillëku nuk ekziston. E dija se në politikë nuk ekzistonte njerzillëku, por mendoja se disa institucione ku kemi lënë fatin e jetës sonë në duar mund të kishte më njerzillëk.

Mbaj mend që më tha një protestues këtu para SPAK një ditë; mos ki frikë nga gjykimi nga kjo godinë këtu, por nga populli. Dhe e vërtetë, do vijë dita që të gjithë do të përgjigjen para popullit. Edhe ne politikanët dhe të gjithë të tjerët”, tha Kryemadhi. /TCH/