Takimi i SHBA-së me 5 vende evropiane ‘ngre shqetësime’ brenda NATO-s

Takimet e zyrtarit të lartë amerikan të Mbrojtjes, Elbridge Colby, me pesë shtete evropiane kanë shkaktuar debat brenda NATO-s.

Shumë e shohin këtë format si rrezik për ndarje mes aleatëve.

Grupi njihet si “Bergen Group”. Në të bëjnë pjesë Suedia, Finlanda, Polonia, Gjermania dhe Holanda. Jashtë tij kanë mbetur Britania, Franca dhe vendet baltike.

Sipas ekspertëve të Aleancës, krijimi i bërthamave të tilla mund të japë idenë se Uashingtoni po trajton ndryshe anëtarët. Ndjeshmëria rritet edhe më shumë në momentin kur SHBA-ja kërkon që evropianët të marrin më shumë peshë në mbrojtjen e kontinentit.

Vetë NATO-ja ka tentuar ta zbusë çështjen. Zyrtarë të saj thonë se takimet në grupe të vogla mes aleatëve janë praktikë e zakonshme.

Megjithatë, mungesa e shteteve baltike bie në sy. Ato renditen ndër vendet që shpenzojnë më shumë për mbrojtjen dhe ndodhen në vijën e parë ndaj Rusisë.

Në këtë kontekst, Lituania i ka drejtuar një ftesë Colby-t për të vizituar rajonin. Qëllimi është që ai të shohë nga afër shkeljet e hapësirës ajrore dhe incidentet e fundit. Autoritetet atje i lidhin këto raste me kërcënimet hibride që vijnë nga Rusia dhe Bjellorusia.